अविरल वर्षाका कारण अवरुद्ध बनेको बिपी राजमार्ग आइतबार बेलुकादेखि पुनः सञ्चालनमा आएको छ। विभिन्न स्थानमा खसेको पहिरो र थुप्रिएको लेदो पन्छाएपछि सडकमा यातायात खुलेको हो।
शुक्रबार र शनिबार परेको वर्षाले काभ्रेपलाञ्चोकको चौकीडाँडादेखि नेपालथोकसम्मका विभिन्न ठाउँमा पहिरो खसेको थियो। सडकमा लेदो र ढुङ्गा थुप्रिएपछि शनिबार बिहानदेखि आवागमन ठप्प भएको थियो।
आइतबार बिहानदेखि डोजरको सहायताले पहिरो र लेदो हटाउने काम सुरु गरिएको थियो। सडक खुलाउन सुरक्षाकर्मी र प्राविधिक टोलीसमेत परिचालन गरिएको जिल्ला प्रहरी कार्यालयले जनाएको छ।
रोशी गाउँपालिका–९ पिन्थलीमा खहरे खोलाले ल्याएको ढुङ्गा र माटोसहितको लेदो तथा वडा नं ८ गिम्दीबेँसीमा खसेको पहिरो हटाएपछि यातायात पुनः सञ्चालनमा आएको हो। जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रविन विष्टले यसबारे जानकारी दिएका हुन्।
