हेटौँडा — स्थानीय मजदुरको अभावले हेटौँडाका किसानहरू धान भित्र्याउने काममा तराईका जिल्लाबाट आउने मजदुरमाथि निर्भर हुन थालेका छन्। कृषिमा युवाहरूको चासो घट्दै जानु र धेरै युवा रोजगारीका लागि विदेशिनुले गाउँघरमा काम गर्ने हातको संख्या निरन्तर घट्दै गएको हो।
पछिल्ला केही वर्षदेखि धान रोप्ने र भित्र्याउने बेलामा सर्लाही, बारा र पर्सालगायत जिल्लाबाट मजदुरहरू समूहमा हेटौँडा आउने गरेका छन्। कमाने, चौघडा, चुच्चेखोला र हटिया क्षेत्रमा उनीहरूले धान काट्ने, उठाउने, बोक्ने र झार्ने काममा सघाइरहेका छन्। स्थानीयवासी श्रीप्रसाद न्यौपानेका अनुसार तराईबाट आउने मजदुर धान भित्र्याउने मौसममा करिब एक महिना बसेर काम सकेपछि मात्र घर फर्किन्छन्। समूहमा आउने भएकाले काम लगाउन पनि सजिलो हुने उनको भनाइ छ।
अर्का स्थानीय हरि ढकालले बाहिरबाट आएका मजदुरले धानको सबै काम गरिदिँदा किसानलाई ठूलो राहत मिलेको बताए। सर्लाहीका रेशम शाहका अनुसार धानको काम गरेवापत सामान्यतः प्रतिकठ्ठा एक हजार रुपैयाँ लिने गरिएको छ। उनीहरू विगत केही वर्षदेखि धान भित्र्याउने बेलामा समूहमा हेटौँडा आउने र करिब एक महिनामा काम सकेर घर फर्कने गरेको बताउँछन्।
