धादिङ जिल्लामा बाढीले पुर्याएको क्षतिको पुनर्निर्माण र सडक पूर्वाधार सुधार्ने विषयमा सरकार र स्थानीय जनप्रतिनिधिबीच सहमति भएको छ। बिहीबार अर्थमन्त्री डा. स्वर्णिम वाग्ले, पूर्वाधार विकास मन्त्री सुनील लम्साल र धादिङ क्षेत्र नम्बर २ बाट निर्वाचित प्रतिनिधिसभा सदस्य बोधनारायण श्रेष्ठबीच भएको छलफलमा यो सहमति जुटेको हो। छलफलमा भएका निर्णयबारे सांसद श्रेष्ठले सामाजिक सञ्जालमार्फत जानकारी दिएका हुन्।
सहमतिअनुसार फुर्के खोलामाथि नयाँ प्रविधिमा आधारित पक्की पुल निर्माण गरिनेछ। उक्त पुललाई ‘सिग्नेचर ब्रिज’ का रूपमा बनाइने र त्यसका लागि छिट्टै बोलपत्र आह्वान गरिने भएको छ। घाटबेँसी पुलको निर्माण काम भने पूर्वाधार विकास कम्पनीमार्फत तुरुन्तै सुरु गरिनेछ।
सडकतर्फ मास्टर–पिपलटार–परेवाटार सडकको स्तरोन्नति गरी कालोपत्रे गर्ने काम अघि बढाइनेछ। यसबाहेक गल्छी–फोस्रेटार–सुनौला बजार–धादिङबेँसी, फोस्रेटार–कोशी खोला–खाल्टे, धादिङबेँसी–साङ्कोष–तिप्लिङ र ज्वालामुखी–बुङ्कोटघाट–बेनीघाट सडकको पनि स्तरोन्नति गरिने सहमति भएको छ।
यी आयोजनाका लागि चाहिने बजेट, काम गर्ने तरिका र समयसीमाबारे थप जानकारी छिट्टै सार्वजनिक गरिने सांसद श्रेष्ठले बताएका छन्। बाढीले भत्काएका संरचना पहिलेकै अवस्थामा फर्काउने मात्र नभई अझ बलिया, सुरक्षित र जलवायु परिवर्तनको असर थेग्न सक्ने बनाउनु आफ्नो मुख्य प्राथमिकता रहेको उनको भनाइ छ।
