चीनको छेन्दुमा आयोजित तियान्फु पुस्तक प्रदर्शनीका अवसरमा नेपाली भाषाबाट चिनियाँ भाषामा अनूदित ६ वटा नेपाली पुस्तक लोकार्पण गरिएको छ। विशेष समारोहबीच सार्वजनिक गरिएका यी कृतिले नेपाली साहित्यलाई चिनियाँ पाठकमाझ पुर्याउने लक्ष्य राखेका छन्।
कार्यक्रममा नेपाल प्रज्ञा-प्रतिष्ठानका कुलपति कुमार नगरकोटी विशेष अतिथिका रूपमा सहभागी भए। यसबारे प्रज्ञा-प्रतिष्ठानका सदस्य सचिव डा. रोशन शेरचनले जानकारी दिएका हुन्। समारोहमा महाकवि लक्ष्मीप्रसाद देवकोटाको ‘लक्ष्मी निबन्धसङ्ग्रह’, भीष्म उप्रेतीको ‘हिमालय, शेर्पा र यती’, ध्रुवचन्द्र गौतमको ‘अलिखित’, सरुभक्तको ‘चुली’, डा. राजु अधिकारीको ‘यस्तो होस् जीवनशैली’ र सुलोचनाको ‘जीवनबाट जीवन सिकौँ’ चिनियाँ भाषामा अनुवाद गरी सार्वजनिक गरियो।
समारोहमा सिचुवान सिन्ह्वा वितरण समूहका उपप्रबन्धक के जिमिङ र तिब्बत विश्वविद्यालयका निर्देशक प्राध्यापक जिउमाउकुले पनि आ-आफ्नो धारणा राखे। नेपाल सरकार र चीन सरकारबीच सन् २०२३ सेप्टेम्बर २५ मा नेपाली तथा चिनियाँ पुस्तक अनुवाद र प्रकाशनसम्बन्धी द्विपक्षीय समझदारीपत्रमा हस्ताक्षर भएको थियो।
सो समझदारीअनुसार नेपालको संस्कृति, पर्यटन तथा नागरिक उड्डयन मन्त्रालय र चीनको नेसनल एडमिनिस्ट्रेसन अफ प्रेस एन्ड पब्लिकेसन्सबीच नेपालका २५ पुस्तक चिनियाँ भाषामा र चीनका २५ पुस्तक नेपाली भाषामा अनुवाद गरी प्रकाशन गर्ने परियोजना अघि बढाइएको थियो। सोही कार्यक्रममा कुलपति नगरकोटी र सिचुवान प्रान्तका उपगभर्नर हु युनबीच कला, साहित्य तथा संस्कृतिको द्विपक्षीय आदानप्रदानबारे वार्ता भयो, जसमा सिचुवान ललितकला प्रकाशन गृहका अध्यक्ष ताङ हाईताओ पनि सहभागी थिए। यस परियोजनाले नेपाली साहित्यको अन्तरराष्ट्रिय पहुँच विस्तार गर्नुका साथै दुई देशबीच सांस्कृतिक समझदारी र साहित्यिक आदानप्रदानलाई अझ बलियो बनाउने अपेक्षा गरिएको छ।
