श्रम संस्कृति पार्टीका प्रमुख सचेतक आर्यन राईले सरकार परिणाममुखी कामभन्दा प्रचारबाजीमा केन्द्रित भएको आरोप लगाएका छन्। मंगलबार काठमाडौंमा आयोजित कार्यक्रममा उनले पछिल्ला ६–७ महिनाको कार्यशैलीमाथि टिप्पणी गर्दै सरकारका कामको मूल्यांकन सामाजिक सञ्जाल र त्यसका एल्गोरिदमका आधारमा नभई वास्तविक उपलब्धिका आधारमा गर्नुपर्ने बताए।
छिमेकी मुलुकसँगको सम्बन्ध र राष्ट्रिय स्वाधीनताबारे बोल्दै राईले कुनै पनि राजनीतिक दल स्थापित हुन छिमेकी मुलुकसामु झुक्नुपर्ने अवस्था दुःखद भएको बताए। पञ्चशीलको सिद्धान्त र बुद्धको विचारअनुसार नेपालले सबै राष्ट्रसँग सन्तुलित र सुमधुर सम्बन्ध राख्नुपर्ने उल्लेख गर्दै उनले मैत्रीपूर्ण सम्बन्धको अर्थ राष्ट्रिय सार्वभौमिकतामा सम्झौता गर्नु नभएको स्पष्ट पारे।
प्रधानमन्त्री बालेन्द्र साहले सीमा विवादबारे दिएको अभिव्यक्ति र अर्थमन्त्री डा. स्वर्णिम वाग्लेको भनाइप्रति आफ्नो गम्भीर असहमति रहेको राईले बताए। उनले यो विषय संसद्मा उठाउने जानकारी दिँदै सीमा सम्बन्धी विषयमा सत्ता पक्ष र प्रतिपक्षबीच मतभेद हुन नहुने र राष्ट्रियताको पक्षमा उभिनु कुनै राष्ट्रको विरोध नभएको उल्लेख गरे।
सामाजिक सञ्जालमा एल्गोरिदम र साइबर समूह प्रयोग गरेर फरक मत राख्ने व्यक्तिको चरित्रहत्या गर्ने प्रवृत्तिप्रति चिन्ता व्यक्त गर्दै राईले युवाहरूलाई कुनै पनि दलको अन्धभक्त नबन्न आग्रह गरे। देशको हित र राष्ट्रिय स्वाधीनताका सवालमा दलगत आग्रहभन्दा माथि उठेर सचेत नागरिकका रूपमा उभिन उनले जोड दिए।
