पर्सामा पटका पड्काउने क्रममा छर्रा लागेर आठ वर्षीय बालकको ज्यान गएको छ।
पर्साको पकहामैनपुर गाउँपालिका–२ मा आज बिहान करिब ८ बजे आफ्नै घरअगाडि पटका पड्काइरहेका स्थानीय रामगुलाम सहनीका छोरा कुन्दन सहनीलाई पटकाको छर्रा छातीको बीच भागमा लागेको थियो।
छर्रा लागेर गम्भीर घाइते भएका बालकलाई तत्काल उपचारका लागि वीरगञ्जस्थित तराई अस्पताल पुर्याइएको थियो। अस्पतालमा चिकित्सकले उनलाई बिहान ८:४५ बजे मृत घोषणा गरेका थिए।
घटनाबारे प्रहरीले थप अनुसन्धान भइरहेको जनाएको छ। चाडपर्वको समयमा पटका पड्काउने क्रम बढेसँगै यस्ता दुर्घटनाको जोखिम पनि बढेको छ। बालबालिकालाई पटकाबाट टाढा राख्न र सुरक्षित तरिकाले मात्र चाड मनाउन प्रहरीले यसअघि नै आग्रह गरिसकेको छ।
