टर्किए । जलवायु परिवर्तनसम्बन्धी संयुक्त राष्ट्रसङ्घीय महासन्धिका पक्ष राष्ट्रहरूको ३१औँ सम्मेलन कोप–३१ आजदेखि टर्किएको अन्ताल्यामा सुरु हुँदैछ । मङ्सिर ४ गतेसम्म चल्ने सम्मेलनको उद्घाटनकै दिन नेपालका तर्फबाट तीनवटा महत्वपूर्ण कार्यक्रम तय भएका छन् ।
स्थानीय समयअनुसार बिहान १० बजेदेखि साढे १० बजेसम्म क्लिन इनर्जी नेपालले सगरमाथादेखि समुद्रसम्म जलवायु वित्त र कार्यान्वयन विस्तार गर्ने विषयमा कार्यक्रम गर्दैछ । दिउँसो साढे १२ बजेदेखि १ बजेसम्म नेपाल सरकारको आयोजनामा हिमालदेखि समुद्रसम्म तत्काल जलवायु कदम चाल्न र जलवायु वित्त बढाउन आह्वान गर्ने कार्यक्रम हुनेछ । त्यस्तै दिउँसो ३ बजेदेखि साढे ४ बजेसम्म नेपाल, जेडओआई, किर्गिस्तान, भुटान र इसिमोडको संयुक्त आयोजनामा अनुकूलन वित्तमार्फत पर्वतीय क्षेत्रको उत्थानशीलता सुदृढीकरण गर्ने विषयमा छलफल हुनेछ ।
परराष्ट्रमन्त्री शिशिर खनाल नेपाली प्रतिनिधिमण्डलको नेतृत्व गर्दै आइतबार नै अन्ताल्या पुगिसकेका छन् । उनले आज उद्घाटन सत्रलाई सम्बोधन गर्नेछन् । खनालले नेपाल, ताजिकिस्तान, किर्गिजस्तान, भुटान र पाकिस्तानको संयुक्त आयोजनामा हुने हिमाली एजेन्डासम्बन्धी उच्चस्तरीय कार्यक्रममा पनि सहभागी हुने कार्यक्रम छ । उनी नोभेम्बर १४ मा स्वदेश फर्कनेछन् ।
सम्मेलनको दोस्रो हप्ता नोभेम्बर १५ देखि २० सम्म कृषि, वन तथा वातावरणमन्त्री गीता चौधरीले नेपाली टोलीको नेतृत्व गर्नेछिन् । उनले जलवायु न्याय, पर्वतीय सवाल, हानि तथा नोक्सानी र जलवायु वित्तलाई नेपालका प्रमुख प्राथमिकताका रूपमा उठाउने बताएकी छन् । नेपाल र भुटानले संयुक्त रूपमा १ दशमलव ५ डिग्री सेल्सियस तापक्रम वृद्धि र पर्वतीय क्षेत्रको एजेन्डा अघि सारेका छन् । भोटेकोशी–रसुवा क्षेत्रमा आएको बाढी र पहिरोबाट भएको क्षतिको विषय पनि अन्तर्राष्ट्रिय समुदायसमक्ष प्रस्तुत गरिनेछ ।
यसपटक नेपालले कोप–३१ मा आफ्नै राष्ट्रिय प्याभिलियन स्थापना गरेको छ, जहाँ ४० भन्दा बढी साइड इभेन्ट आयोजना गर्ने तयारी छ । सम्मेलनकै दौरान नेपाल र कोरिया सरकारबीच कार्बन व्यापारसम्बन्धी द्विपक्षीय समझदारीपत्रमा हस्ताक्षर गर्ने कार्यक्रमसमेत रहेको छ ।
सम्मेलनको अधिवेशनपूर्व अवधि नोभेम्बर २ देखि ८ तारिखसम्म सम्पन्न भइसकेको छ भने मुख्य अधिवेशन नोभेम्बर ९ देखि २० तारिखसम्म चल्नेछ । नोभेम्बर ११ र १२ मा विश्व नेताहरूको शिखर सम्मेलन हुनेछ भने नोभेम्बर १५ आइतबार सम्मेलन केन्द्र बन्द रहनेछ । सम्मेलनसँगै क्योटो प्रोटोकलको सिएमपी २१, पेरिस सम्झौताको सिएमए ८, एसबिएसटिए ६५ र एसबिआइ ६५ का सत्रहरू पनि हुनेछन् ।
