पाराग्वेमा चुलिएको बैंकिङ सङ्कटसँग जोडिएको अनुसन्धान अगाडि बढ्दै जाँदा प्रहरीले पूर्वराष्ट्रपति सान्टियागो पेनाको निवासमा छापा मारेको छ। लोकप्रिय अनलाइन ऋणदाता युएनो बैंक धराशायी भएपछि सुरु भएको छानबिनमा पेनाविरुद्ध आपराधिक अभियोगसमेत दर्ता गरिएको छ।
अधिकारीहरूले गत साता युएनो बैंक आफ्नो नियन्त्रणमा लिएका थिए। देशको करिब ६५ लाख जनसङ्ख्यामध्ये झन्डै आधा मानिसको खाता रहेको उक्त बैंकमा सरकारी निकायको ८० करोड अमेरिकी डलरभन्दा बढी रकम जम्मा थियो। बैंक डुबेपछि देशभर विरोध प्रदर्शन चर्किएको थियो।
सन् २०२३ मा राष्ट्रपति बनेका पेनाले गत वर्षसम्म बैंकको माउ कम्पनी युएनो होल्डिङमा सेयर राखेका थिए। राष्ट्रपतीय हैसियतको दुरुपयोग गर्दै सरकारी निक्षेप बैंकमा जम्मा गराएको, वित्तीय अनियमितता र शङ्कास्पद ऋणबारे जानकारी हुँदाहुँदै पनि समस्या लुकाएको आरोप उनीमाथि छ।
अभियोजकहरूका अनुसार सरकारी निकायबाट निक्षेप उठाइरहेको युएनो बैंकले बैंकका उच्च अधिकारीसँग सम्बन्धित कम्पनीहरूलाई शङ्कास्पद ऋण दिएको थियो। यही प्रकरणको अनुसन्धानका क्रममा राजधानी असुनसियोनबाहिर रहेको पेनाको निवासमा छापा हानिएको हो।
अभियोगपत्रमा सन् २०२४ मा घर निर्माणका लागि पेनाले युएनो बैंकबाट दुई किस्तामा पाँच लाख अमेरिकी डलर ऋण लिएको उल्लेख छ। उनको मासिक किस्ता ३८ हजार डलर रहेको र यो राष्ट्रपतिका रूपमा पाउने मासिक तलबको छ गुणा भएको अभियोगपत्रमा जनाइएको छ।
सिनेटले गत शुक्रबार पेनालाई पदबाट हटाउने निर्णय गरेपछि उपराष्ट्रपति पेद्रो एलियानाले राष्ट्रपतिको जिम्मेवारी सम्हालेका छन्। उनले आइतबार बैंक धराशायी भएपछि रोकिएका १२ लाख ग्राहकको निक्षेप सरकारले फिर्ता गरेको जानकारी दिए। हालसम्म करिब १५ करोड ८० लाख अमेरिकी डलर फिर्ता भइसकेको र बाँकी रकम वितरण यसै साता पनि जारी रहने उनले बताएका छन्।
