दीपावलीको राति भारतको मध्यप्रदेशमा दुई छुट्टाछुट्टै स्थानमा लागेको आगोले १२ जनाको ज्यान लिएको छ। कटनी र सिवनी जिल्लामा भएका घटनामा केही व्यक्ति घाइते भएका छन्, तीमध्ये केहीको अवस्था गम्भीर रहेको बताइएको छ।
कटनी जिल्ला सदरमुकामबाट करिब ५५ किलोमिटर टाढा रहेको बरही कस्बामा आइतबार राति साढे ११ बजेतिर आगो लाग्यो। त्यहाँ पूरन अग्रवाल र रितेश अग्रवालको भाँडाकुँडा पसलमा सुरु भएको आगो माथि रहेको तीनतले घरसम्म फैलियो। आगो लाग्दा परिवारका सदस्यहरू सुतिरहेका थिए र धुवाँ तथा आगो छिटो फैलिएकाले उनीहरू बाहिर निस्कन सकेनन्। यस घटनामा परिवारका ६ जनाको ज्यान गयो। मृतकमा दुई वृद्धवृद्धा, एक महिला र तीन बालबालिका छन्। एक पुरुष र एक महिलाले भने जसोतसो बाहिर निस्केर ज्यान जोगाए। खबर पाएपछि स्थानीय बासिन्दाले उद्धार थाले र बरही, विजयराघवगढ, कैमोर तथा कटनी नगर निगमका दमकल टोली घटनास्थल पुगे।
त्यस्तै, सिवनी जिल्लाको छपारा नगरस्थित महावीर वार्डको जैन मोहल्लामा सोमबार बिहान करिब ३ बजे सुनचाँदी व्यवसायी कुन्दन सोनीको घरमा आगो लाग्यो। सुतिरहेका बेला लागेको आगो तीव्र गतिमा फैलिएपछि घरभित्र रहेका मानिसहरू बाहिर निस्कन सकेनन्। घरमा रहेका १० जनामध्ये ६ जनाको मृत्यु भयो भने चार जनालाई सुरक्षित निकालेर अस्पताल भर्ना गरिएको छ। यो विवरण लखनादौनका एसडीओपी अपूर्व भलावीले दिएका हुन्। दुवै घटनामा आगलागीको कारण खुल्न सकेको छैन र प्रहरीले अनुसन्धान सुरु गरेको छ।
