दीपावली मनाउने क्रममा पटका पड्काउँदा पर्सामा पाँच वर्षीय एक बालकको ज्यान गएको छ।
प्रहरीका अनुसार घटना सोमबार बिहान पकहाँमैनपुर गाउँपालिका–२ मधुबनीमा भएको हो। स्थानीय मखु सहनीका पाँच वर्षीय छोरा पटका पड्काइरहेका बेला अचानक उनको छातीमा आगो लागेको थियो।
आगोले जलेर बालक बेहोस भएपछि परिवारले उनलाई तत्काल वीरगन्जस्थित तराई अस्पताल पुर्याएको थियो। अस्पतालमा उपचार भइरहेकै बेला उनको मृत्यु भएको जिल्ला प्रहरी कार्यालय पर्साले पुष्टि गरेको छ।
इलाका प्रहरी कार्यालय पोखरियाका प्रहरी निरीक्षक भानुभक्त अर्यालले बालकको छातीमा आगो लागेर जलेको जानकारी दिए। घटनाबारे थप विवरण आउन बाँकी रहेको प्रहरीले जनाएको छ।
चाडपर्वको रमझममा पटका पड्काउँदा बालबालिकाको सुरक्षामा विशेष ध्यान दिनुपर्नेमा प्रहरीले अभिभावकलाई सचेत गराएको छ। पटका पड्काउँदा आगलागी र गम्भीर घाइते हुने जोखिम रहने भएकाले बालबालिकालाई पटकाबाट टाढा राख्न र सुरक्षित तरिकाले मात्र चाड मनाउन प्रहरीको आग्रह छ।
