बङ्गलादेशका अनुभवी अलराउन्डर शाकिब अल हसन नेपाल प्रिमियर लिग (एनपीएल) को तेस्रो संस्करण खेल्न काठमाडौं आइपुगेका छन्। यस सिजन उनी पोखरा एभेन्जर्सको जर्सीमा देखिनेछन्। टोलीले उनलाई विदेशी खेलाडीका रूपमा अनुबन्ध गरेको हो र प्रतियोगिताभर उनी टोलीमै रहनेछन्।
३९ वर्षीय शाकिबको आगमनले एनपीएलमा अन्तर्राष्ट्रिय क्रिकेटका चर्चित नामहरूको उपस्थिति थप बलियो बनेको छ। लिगको तेस्रो संस्करण सोमबारदेखि सुरु हुँदैछ, र उनको उपस्थितिले पोखरा एभेन्जर्सको टोलीलाई ठूलो बल मिल्ने अपेक्षा गरिएको छ।
शाकिब आधुनिक क्रिकेटका सबैभन्दा सफल अलराउन्डरमध्ये एक मानिन्छन्। बायाँहाते ब्याटिङ र बायाँहाते स्पिन बलिङ गर्ने उनले बङ्गलादेशका लागि टेस्ट, एकदिवसीय र टी–२० अन्तर्राष्ट्रिय क्रिकेटमा लामो समय महत्त्वपूर्ण योगदान दिएका छन्।
विश्वभरका फ्रेन्चाइज प्रतियोगिताको अनुभव बटुलेका शाकिबले इन्डियन प्रिमियर लिगमा कोलकाता नाइट राइडर्स र सनराइजर्स हैदराबादबाट खेलेका छन्। पाकिस्तान सुपर लिगलगायत अन्य प्रतियोगितामा पनि उनको अनुभव छ।
सन् २०१९ मा इङ्ल्यान्ड र वेल्समा भएको एकदिवसीय विश्वकपमा उनको प्रदर्शन अविस्मरणीय रह्यो। त्यस प्रतियोगितामा उनले ८ खेलमा ६०६ रन बनाउनुका साथै ११ विकेट लिएका थिए। एउटै एकदिवसीय विश्वकपमा ६०० भन्दा बढी रन र कम्तीमा १० विकेट लिने उनी पहिलो खेलाडी बनेका थिए।
