दसैं मनाएर सुदूरपश्चिमका धेरै नेपाली फेरि रोजगारीका लागि भारत फर्किन थालेका छन्। चाड सकिएसँगै प्रदेशका सीमा नाकामा भारततर्फ जानेहरूको चहलपहल बढेको छ। खेतीपातीबाट मात्र परिवारको खर्च धान्न नसकिने भएकाले धेरैले भारतमा काम खोज्नुपरेको बताएका छन्।
कैलालीको जानकी गाउँपालिका–३ का मनिष थापा दसैंमा घर आएर परिवारसँग चाड मनाएपछि फेरि भारत जान लागेका छन्। घरमा आमाबुबा, श्रीमती र छोराछोरी छन्। कञ्चनपुरको बेलौरी नगरपालिका–२ का शिव विक पनि दसैंका लागि मात्र बिदा लिएर आएका थिए। मुम्बईको एक प्लास्टिक कम्पनीमा काम गर्ने उनी दुई हप्ताको बिदापछि काममा फर्किएका छन्।
धनगढी उपमहानगरपालिका–२ का मणीरा चौधरीले भारतमा जुत्ता कम्पनीमा मेसिन चलाउनेदेखि कार कम्पनीमा खाना पकाउने र सुरक्षा गार्डसम्मको काम गरेका छन्। नेपालमा स्थायी रोजगारी नपाएकाले पटक–पटक भारत जानुपरेको उनको गुनासो छ। तिहारसम्म बस्ने मन भए पनि बिदा छोटो भएकाले फर्किनुपरेको उनले बताए।
बझाङको दुर्गाथली गाउँपालिका–३ का रमेश धामी पनि दसैंपछि भारत फर्किने तयारीमा छन्। भारतमा कमाएको पैसाले नै घर खर्च, छोराछोरीको पढाइ र ऋणको किस्ता धान्नुपर्ने उनको भनाइ छ। सुदूरपश्चिमका नौवटै जिल्लाबाट निर्माण, होटल, कारखाना, सुरक्षा गार्ड र चौकीदारीलगायत कामका लागि मानिस भारत जाने गरेका छन्। खुला सीमाका कारण भारत जानेको यकिन तथ्यांक सरकारसँग छैन। गौरीफन्टा, गड्डाचौकी, झुलाघाट र दार्चुलाका नाकाबाट वर्षेनी ठूलो संख्यामा नेपाली भारत जाने गरेका छन्।
