तेहरानबाट शनिबार इरानका सर्वोच्च नेता मोजतबा खामेनीले अमेरिका र इजरायललाई फेरि युद्धमा नफर्कन कडा चेतावनी दिएका छन्। उनको वेबसाइटमा प्रकाशित लिखित वक्तव्यमार्फत आएको यो सन्देशमा सम्भावित आक्रमणको धम्की दिने ती दुई मुलुकलाई सैन्य टकरावको बाटो नअपनाउन आग्रह गरिएको छ।
वक्तव्यमा खामेनीले भनेका छन्, ‘यदि शत्रुहरूले फेरि सैन्य वा आतङ्कवादी आक्रमण गरे भने त्यसलाई रोक्ने समय र अवस्था इरानका सशस्त्र बल र इरानी जनताले निर्धारण गर्नेछन्।’ यो टिप्पणी सर्वोच्च नेता र उच्च सैन्य कमान्डरहरूबिचको बैठकपछि सार्वजनिक भएको हो। उक्त बैठकमा सशस्त्र बलका प्रमुख अलि अब्दोल्लाही, सेना प्रमुख अमिर हातमी र क्रान्तिकारी गार्डका कमान्डर अहमद वाहिदी सहभागी थिए।
सर्वोच्च नेता बनेपछि सार्वजनिक रूपमा नदेखिएका खामेनी र सैन्य अधिकारीहरूबिच सार्वजनिक जानकारीमा आएको यो पहिलो बैठक हो। गत फेब्रुअरीमा मध्यपूर्वी युद्धको सुरुआतका क्रममा अमेरिका र इजरायलले गरेको संयुक्त आक्रमणमा उनका बुबा अयातुल्ला अलि खामेनी मारिएका थिए।
वक्तव्यअनुसार खामेनीले कमान्डरहरूलाई निर्देशन दिँदै भनेका छन्, ‘कुनै पनि स्तर वा प्रकारको धम्कीलाई तत्काल, प्रभावकारी र भौगोलिक रूपमा असीमित प्रतिक्रिया दिनुपर्छ।’ साथै उनले अमेरिकी र यहुदी शत्रुका सबै प्रकारका मूर्त तथा अमूर्त सम्पत्तिहरूलाई सम्भावित लक्ष्यको सूचीमा अद्यावधिक गर्न आदेश दिएका छन्।
युद्ध पुनः सुरु हुन नदिन नयाँ कूटनीतिक प्रयास भइरहेका बेला सर्वोच्च नेताको यो वक्तव्य आएको हो। गत फेब्रुअरी २८ मा अमेरिका र इजरायलको आक्रमणबाट युद्ध सुरु भएको थियो। त्यसको जवाफमा इरानले सो क्षेत्रका विभिन्न देशमा आक्रमण गरेको थियो।
यसैबिच युद्ध रोक्ने प्रयासस्वरूप शुक्रबार कतारको प्रतिनिधिमण्डल तेहरान पुगेर इरानी अधिकारीहरूसँग वार्ता गरेको छ। इरानले अमेरिकी उपराष्ट्रपति जेडी भान्सको पत्र प्राप्त गरे पनि हालसम्म त्यसको कुनै जवाफ नदिएको इरानी सञ्चारमाध्यमले जनाएका छन्।
