हेटौँडा — दशौँ राष्ट्रिय खेलकुद प्रतियोगिताको तयारीका क्रममा हेटौँडामा सम्पन्न बागमती प्रदेशस्तरीय फुलकन्ट्याक्ट कराते छनोटमा मकवानपुरका खेलाडीले उत्कृष्ट नतिजा निकालेका छन्। छनोट भएका १४ खेलाडीमध्ये ६ जना मकवानपुरका छन्।
प्रदेशका १३ जिल्लाका ७५ खेलाडी सहभागी प्रतियोगितामा महिला र पुरुष दुवैतर्फ विभिन्न तौल समूह तथा काताबाट खेलाडी छनोट गरिएको बागमती प्रदेश खेलकुद परिषद्का सदस्य गोविन्दलाल श्रेष्ठले जानकारी दिए।
महिलातर्फ ४५ केजीमा ललितपुरकी साहारा वाइबा, ५० केजीमा काठमाडौँकी उपासना श्रेष्ठ, ५५ केजीमा सिन्धुलीकी कविता मोक्तान र ६० केजीमा मकवानपुरकी रेश्मा थापा छनोट भए। खुला तौल समूहमा मकवानपुरका सेर्साङ स्याङ्तान र महिला कातामा मकवानपुरकै रसु श्रेष्ठ छनोट भए।
पुरुषतर्फ ४५ केजीमा मकवानपुरका रिदम थापा, ५० केजीमा रामेछापका सुजन विक, ५५ केजीमा काभ्रेका सुसान तामाङ, ६० केजीमा मकवानपुरका सन्तोषकुमार लामा, ६५ केजीमा काठमाडौँका अनुग्रह देवकोटा र ७० केजीमा मकवानपुरका आर्यन सिन्चुरी छनोट भए। खुला तौल समूहमा ललितपुरका साहिल श्रेष्ठ र पुरुष कातामा रामेछापका विवेक बर्देवा छनोट भए।
छनोट भएका खेलाडीलाई राष्ट्रिय खेलकुद परिषद्का प्रमुख प्रशिक्षक कुमार श्रेष्ठले पदक तथा प्रमाणपत्र प्रदान गरे।
