काठमाडौं । देशभर पश्चिमी वायुको आंशिक असर देखिएको छ। हिमाली र पहाडी क्षेत्रका केही भागमा आज हल्का वर्षा तथा हिमपात हुन सक्ने अनुमान गरिएको छ भने तराईका अधिकांश ठाउँमा मौसम सफा रहने देखिएको छ।
जल तथा मौसम विज्ञान विभागको मौसम पूर्वानुमान महाशाखाका अनुसार अहिले गण्डकी, लुम्बिनी, कर्णाली र सुदूरपश्चिम प्रदेशका हिमाली भू-भागमा आंशिक बदली छ। देशका बाँकी भू-भागमा भने मौसम मुख्यतया सफा रहेको छ।
बुधबार कोशी, बागमती र गण्डकी प्रदेशका हिमाली भू-भागमा साधारणतया बदली रहने पूर्वानुमान छ। बाँकी हिमाली भू-भाग, देशका पहाडी क्षेत्र तथा मधेस प्रदेशमा आंशिक बदली हुनेछ भने बाँकी तराई भू-भागमा मौसम मुख्यतया सफा रहनेछ।
कोशी, बागमती र गण्डकी प्रदेशका हिमाली भू-भागका थोरै स्थानहरूमा हल्का वर्षा तथा हिमपातको सम्भावना छ। लुम्बिनी, कर्णाली र सुदूरपश्चिम प्रदेशका हिमाली भू-भागका एक-दुई स्थानमा मेघगर्जन र चट्याङ्गसहित हल्का वर्षा तथा हिमपात हुन सक्ने महाशाखाले जनाएको छ।
त्यसैगरी कोशी, बागमती र गण्डकी प्रदेशका पहाडी भू-भागका एक-दुई स्थानमा हल्का वर्षाको सम्भावना छ। मधेस र कोशी प्रदेशका तराई भू-भागका एक-दुई स्थानमा पनि हल्का वर्षा हुन सक्ने पूर्वानुमान गरिएको छ।
हिमाली क्षेत्रमा यात्रा गर्ने तथा उच्च पहाडी भेगमा रहेका बासिन्दालाई मौसममा आउन सक्ने परिवर्तनप्रति सचेत रहन महाशाखाले आग्रह गरेको छ।
