काठमाडौँ — विवाहित महिलाहरूको सौन्दर्य तथा प्रतिभा प्रतियोगिता ‘मिसेस नेपाल वर्ल्ड २०२६’ को उपाधि बिनिता गुरुङले जितेकी छन्। शनिबार साँझ भृकुटीमण्डपस्थित नेपाल पुलिस क्लबमा सम्पन्न ग्राण्ड फिनालेमा उनले २१ प्रतिस्पर्धीलाई पछि पार्दै ताज आफ्नो बनाएकी हुन्।
रिबन इन्टरटेनमेन्टले आयोजना गरेको यो प्रतियोगिताको छैटौँ संस्करण हो। विवाहित महिलाको प्रतिभा, व्यक्तित्व विकास, आत्मविश्वास र क्षमता सार्वजनिक रूपमा प्रस्तुत गर्ने उद्देश्यले प्रतियोगिता आयोजना गरिएको आयोजकले जनाएको छ।
प्रतियोगितामा विभिन्न विधाका उपाधि पनि घोषणा गरिए। शिल्पा न्यौपाने महर्जन ‘मिसेस नेपाल इन्टरनेसनल’ र क्रिस्टिना ज्ञवाली ‘मिसेस नेपाल कस्मो’ घोषित भए भने रिचा शर्मा ‘एमएस नेपाल इन्टरनेसनल’ बनिन्।
नेहा गुप्ता प्रथम रनरअप, ज्योति लामिछाने द्वितीय रनरअप र सगुन खनाल तृतीय रनरअप बने। रिबन इन्टरटेनमेन्टका सञ्चालक निशुकान्त झाको अध्यक्षतामा सम्पन्न कार्यक्रमको नेतृत्व अन्तर्राष्ट्रिय कोरियोग्राफर अश्विनीकान्त झाले गरेका थिए। निर्णायक मण्डलमा वरिष्ठ अभिनेता राजेश हमाल, अभिनेत्री रेखा थापा र सन् २०२४ की विजेता डा. डेलिना कार्कीलगायत रहेका थिए।
