हिन्दू र बौद्ध धर्मावलम्बीहरूको साझा तीर्थस्थल मुस्ताङको मुक्तिनाथ मन्दिरमा यस वर्ष दसैँको टीका, जमरा र आशीर्वाद सर्वसाधारणलाई दिइने भएको छ । मन्दिरका पुजारी कृष्णप्रसाद सुवेदीले विजयादशमीका दिन घरपरिवारबाट टाढा रहेका र अभिभावकविहीनलाई समेत मन्दिरमै टीका लगाइदिने व्यवस्था गरिएको जानकारी दिए ।
उनका अनुसार दसैँको बिहान ५ बजेदेखि मुक्तिनाथमा भगवान्को नृत्य आराधना सुरु हुनेछ । आराधना करिब दुई घण्टासम्म चलेपछि विजयादशमीको शुभसाइतको समयमा अक्षतारूपी टीका र जमरा लगाएर भक्तजनलाई आशीर्वाद दिइने कार्यक्रम तय गरिएको हो ।
आफन्त, मान्यजन र परिवारसँग टीका लगाउन नसक्नेहरूलाई धाममै आउँदा दसैँको पूर्ण अनुभूति मिलोस् भन्ने उद्देश्यले यो व्यवस्था मिलाइएको मन्दिर प्रशासनको भनाइ छ । नवरात्रभरि भक्तजनको भीड बढिरहेको मुक्तिनाथ क्षेत्रमा विजयादशमीका दिन विशेष कार्यक्रम आयोजना गर्न लागिएको हो ।
कात्तिक ३ गते मंगलबार साँझ मन्दिर प्रशासनले गरेको यस घोषणापछि तीर्थालुहरूले मुक्तिनाथमा नै टीका जमरा लगाउने योजना बनाउन थालेका छन् । हिमाली क्षेत्रको कठ्याङ्ग्रिँदो चिसोबीच दसैँ मनाउन आउने भक्तजनका लागि मन्दिर क्षेत्रमा आवश्यक प्रबन्ध मिलाइने बताइएको छ ।
