आइसिसी विश्वकप लिग–२ को एकदिवसीय अन्तरराष्ट्रिय श्रृङ्खला खेलेर नेपाली राष्ट्रिय पुरुष क्रिकेट टोली स्वदेश फर्किएको छ। ओमानमा सम्पन्न उक्त श्रृङ्खलामा सहभागिता जनाएको नेपाली टोली आज बेलुका काठमाडौं आइपुगेको हो।
त्रिभुवन अन्तरराष्ट्रिय विमानस्थलमा टोलीलाई नेपाल क्रिकेट सङ्घ (क्यान)का प्रतिनिधिहरूले स्वागत गरेका थिए।
लिग–२ को अन्तिम श्रृङ्खलामा नेपालको प्रदर्शन उत्कृष्ट रह्यो। नेपालले खेलेका चार खेलमध्ये तीन खेलमा जित निकाल्यो। श्रृङ्खलामा नेपालले आयोजक ओमान र क्यानडाविरुद्ध प्रतिस्पर्धा गरेको थियो।
ओमानको मैदानमा नेपालले दुवै विपक्षीलाई पराजित गर्दै तीन जित हात पार्नु लिग–२ मा नेपालका लागि स्मरणीय प्रदर्शन बनेको छ। नेपाली टोलीको यस सफलताले आगामी खेलप्रति समर्थकको अपेक्षा थप बढेको छ।
क्यानका प्रतिनिधिहरूले टोलीको यो प्रदर्शनको प्रशंसा गर्दै विमानस्थलमै बधाई तथा शुभकामना व्यक्त गरेका थिए। अब नेपाली टोलीले घरेलु मैदानमा थप तयारी गर्ने कार्यक्रम छ।
