हिमाली जिल्ला मुस्ताङमा आँखासम्बन्धी उपचार घरनजिकै पाउन थालेपछि स्थानीय बासिन्दालाई ठूलो राहत मिलेको छ। जोमसोमस्थित प्रदेश अस्पतालमा सञ्चालित सामुदायिक आँखा केन्द्रले दुर्गम बस्तीका नागरिकसम्म सेवा पुर्याइरहेको छ।
केन्द्र २०६६ सालमा स्थापना भएको थियो। नेपाल आँखा कार्यक्रमअन्तर्गत तिलगङ्गा आँखा प्रतिष्ठानसँगको सहकार्य र दृष्टिविहीनता निवारण परियोजनाको आर्थिक सहयोगमा यो सेवा सुरु भएको हो। त्यसअघि आँखा जाँचका लागि सुगम ठाउँका अस्पताल धाउनुपर्ने बाध्यता थियो।
केन्द्रका नेत्र अधिकृत रुमिला नेपालीका अनुसार हालसम्म करिब २० हजार जनाको आँखा परीक्षण भइसकेको छ। तिलगङ्गाका वरिष्ठ चिकित्सकको सहभागितामा ५०० जनाभन्दा बढीको मोतिबिन्दु शल्यक्रिया पनि सम्पन्न भएको छ। केन्द्रले प्रत्येक वर्ष करिब दुई हजार जनाको परीक्षण गर्दै आएको छ।
सेवा जिल्लाका पाँचवटै पालिकासम्म पुगेको छ। मोतिबिन्दु भएका बिरामी पहिचान गरी लगत तयार पारिन्छ र हरेक वर्ष उपल्लो मुस्ताङको चराङ तथा तल्लो मुस्ताङको जोमसोममा शल्यक्रिया शिविर सञ्चालन गरिन्छ। जाँच, औषधि र चश्मा सुपथ मूल्यमा उपलब्ध छन्।
आर्थिक रूपमा कमजोर र ज्येष्ठ नागरिकलाई लक्षित गर्दै सेवा विस्तार गरिएको छ। गुणस्तरीय जाँचका लागि आवश्यक उपकरणको व्यवस्था छ भने सामुदायिक स्वास्थ्य स्वयंसेविकालाई सचेतना तालिम पनि दिइन्छ। चराङमा सेवा फाउन्डेसनको सहयोगमा आँखा उपचार क्लिनिक सञ्चालनमा छ। यसले समय र खर्च दुवै बचाएको स्थानीयको भनाइ छ।
