मुम्बई प्रहरीको अपराध शाखाले बलिउड अभिनेता टाइगर श्राफमाथि अक्टोबर १८ मा भएको गोली प्रहारको अनुसन्धानमा नयाँ तथ्य सार्वजनिक गरेको छ। अनुसन्धानबाट आक्रमणकारीहरूले श्राफलाई निशाना बनाउनुअघि अन्य दुई चर्चित अभिनेताको घरको रेकी गरेको तर दुवै प्रयास असफल भएको खुलेको छ।

प्रहरीका अनुसार आक्रमणकारीहरूलाई अभिनेता इमरान हाशमीको घरको रेकी गर्न भनिएको थियो, तर घर फेला पार्न नसक्दा उनीहरू असफल भए। त्यसअघि उनीहरूले सलमान खान र आमिर खानको घरमा पनि रेकी गरेका थिए। सलमान खान लामो समयदेखि लरेन्स बिश्नोई समूहको निशानामा रहँदै आएका थिए। आमिर खान दक्षिण मुम्बई सरिसकेको कुरा आक्रमणकारीहरूलाई थाहा थिएन, त्यसैले उनीहरूले आमिरलाई भेट्टाउन सकेनन्।

हाशमीको निवासबारे स्थानीयस्तरमा सोधपुछ गर्दा पनि घर फेला नपरेपछि आक्रमणकारीहरूले आफ्ना कमान्डरलाई जानकारी गराएका थिए। त्यसपछि उनीहरूले सामाजिक सञ्जालमा श्राफका भिडियोहरू हेरेर उनी हरेक आइतबार फुटबल खेल्न जुहुस्थित पुष्प नार्सी मैदान जाने कुरा पत्ता लगाए र श्राफलाई निशाना बनाउने निर्णय गरेको अधिकारीले बताए।

यसैबीच हरियाणाको सोनिपतबाट पक्राउ परेका चार अभियुक्तलाई सोमबार एस्प्लानेड अदालतमा उपस्थित गराइएको छ। २१ वर्षीया राधा वर्मा, २१ वर्षीया बबिता राव, 21 वर्षीय कुणाल जामिनसिंह र १९ वर्षीय सुमित सरोलियालाई अक्टोबर २८ सम्म प्रहरी हिरासतमा पठाइएको छ।

अदालतमा प्रहरीले उनीहरूले सुटरहरूलाई हतियार उपलब्ध गराएको जानकारी दिएको छ। कुणाल जामिनसिंह बिश्नोई समूहका भनिएका अनिल पण्डितको सम्पर्कमा थिए, र पण्डितले नै आक्रमणको जिम्मा लिएका थिए। जामिनसिंहले राधा वर्मालाई पेस्तोल दिएका थिए, त्यसपछि राधा र बबिता रावले अक्टोबर १७ मा दादरमा सुटर रेहान अन्सारीलाई भेटेर सो पेस्तोल हस्तान्तरण गरेका थिए। आक्रमण लगत्तै हतियार फिर्ता गर्न निर्देशन दिइएको प्रहरीले बताएको छ।

उक्त आक्रमणमा टाइगर श्राफ बालबाल बचेको, उनका चालक र एक ब्लगरलाई गोली लागेको थियो। यस घटनामा हालसम्म ११ जना अभियुक्त पक्राउ परिसकेका छन्।