विराटनगर — कोशी प्रदेश सरकारले सप्तकोशी नदीमा भएको डुङ्गा दुर्घटनाको सत्यतथ्य पत्ता लगाउन छानबिन समिति गठन गरेको छ। आज बसेको मन्त्रिपरिषद्को बैठकले प्रदेश सचिव आसमान तामाङको संयोजकत्वमा समिति बनाउने निर्णय गरेको हो। समितिलाई सात दिनभित्र प्रतिवेदन बुझाउने जिम्मेवारी दिइएको छ। समितिले दुर्घटनाका कारण र परिस्थितिबारे अध्ययन गरी आफ्नो निष्कर्ष प्रतिवेदनमार्फत सरकारलाई बुझाउनेछ। समिति गठनसँगै दुर्घटनाको वास्तविक अवस्थाबारे विस्तृत अध्ययन हुने भएको छ।
दुर्घटना धनकुटा, भोजपुर र उदयपुरको सङ्गमस्थल त्रिवेणीस्थित सप्तकोशी नदीमा कात्तिक ८ गते भएको थियो। सरकारका प्रवक्ता एवं आन्तरिक मामिला तथा कानुनमन्त्री गोम्बु शेर्पाले मन्त्रिपरिषद्का निर्णय सार्वजनिक गर्दै छानबिन समिति गठन भएको जानकारी दिएका हुन्।
बैठकले दुर्घटनामा ज्यान गुमाउनेहरूको परिवारप्रति हार्दिक समवेदना प्रकट गरेको छ। हराइरहेका व्यक्तिहरूको खोजी गर्न सम्बन्धित निकायलाई आग्रह गर्ने निर्णय पनि बैठकले गरेको प्रवक्ता शेर्पाले बताए।
यसैगरी बैठकले प्रदेशको मुख्यन्यायाधिवक्ता कार्यालयको आर्थिक वर्ष २०८२–८३ को वार्षिक प्रतिवेदन प्रदेशसभामा पेस गर्ने निर्णय गरेको छ। कोशी प्रदेश समन्वयात्मक पर्यटकीय सेवा कक्ष तथा ‘हटलाइन’ सञ्चालन निर्देशिका, २०८३ स्वीकृत भएको जानकारी पनि प्रवक्ता शेर्पाले दिए।
