कञ्चनपुर — महेन्द्रनगरमा साइकलको पछाडि टोकरीमा ड्रागन फ्रुट बोकेर बजार चहार्ने एक सरकारी कर्मचारी अहिले स्वरोजगारको उदाहरण बनेका छन्। भीमदत्त नगरपालिका–२ महोलियाका ३२ वर्षीय गणेशदत्त पन्तले कोष तथा लेखा नियन्त्रक कार्यालयमा कार्यालय सहयोगीका रूपमा ११ वर्षको सेवा अवधि पूरा गरेका छन्। तर कार्यालय समयबाहेकको फुर्सद उहाँले खाली बस्नमा खर्च गरेका छैनन्।
पछिल्ला चार वर्षदेखि पन्त बिहान एकदेखि डेढ घण्टा र साँझ पाँच बजेदेखि बजारका गल्लीगल्लीमा पुग्छन्। व्यापारका दिन उहाँको दैनिक नाफा एक हजारदेखि एक हजार दुई सय रुपैयाँसम्म पुग्छ। बजारमा यसको माग राम्रो रहेको उहाँको अनुभव छ। स्थानीय बजारबाहेक दाङ, सुर्खेत, नेपालगञ्ज र डडेल्धुराबाट फल ल्याएर उहाँले थोक र खुद्रा दुवै रूपमा बिक्री गर्दै आएका छन्। प्रतिकिलो मूल्य ४५० देखि ५०० रुपैयाँसम्म रहेको जानकारी उहाँले दिनुभयो।
“यो व्यापार थालेपछि तलब पनि बचत भएको छ, घरखर्च यहीबाट चल्छ,” पन्त भन्छन्। विदेश रोजगारीका लागि जाने युवाले घुम्ती व्यापारबाट प्रेरणा लिनुपर्ने उहाँको जोड छ। भारतमा मजदुरी गरिरहेका आफ्ना भाइ र बुहारीलाई पनि उहाँले यही व्यापारमा लगाए — बुहारीले मासिक ३० देखि ३५ हजार रुपैयाँसम्म बचत गरिरहेकी छिन्। कृषि, व्यापार र आयमूलक काममा युवालाई लाग्न सरकारले प्राथमिकता दिनुपर्ने उहाँको माग छ।
