रूपन्देहीको मर्चवार क्षेत्रमा सडक, स्वास्थ्य र शिक्षाका पूर्वाधार निर्माणलाई प्राथमिकता दिइने भएको छ। पूर्वाधार विकासमन्त्री सुनिल लम्सालले सोमबार क्षेत्रको स्थलगत अनुगमन गर्दै विकासका योजनाहरू अगाडि बढाउने जानकारी दिएका हुन्।
मन्त्री लम्सालका अनुसार चालु आर्थिक वर्षभित्रै मर्चवारमा चार लेन सडक विस्तारको काम थालिनेछ। पहिलो खण्डको पाँच किलोमिटर सडकको विस्तृत परियोजना प्रतिवेदन तयार भइसकेको छ भने सो खण्डको निर्माणका लागि छिट्टै बोलपत्र आह्वान गरिनेछ। सोही खण्डको थप १५ किलोमिटर सडकको प्रतिवेदन बनाउने काम भइरहेको छ। दोस्रो खण्डमा केही ढिलाइ भए पनि चालु आर्थिक वर्षको अन्त्यसम्ममा बोलपत्र निकाल्ने योजना छ।
धार्मिक तथा पर्यटकीय सम्भावना बोकेको मर्चवारी माई मन्दिरसम्मको सडक पनि यसै आर्थिक वर्षभित्र निर्माण गर्ने योजना छ। मुख्य सडक र ग्रामीण सडकको स्तरोन्नतिका लागि बजेट छुट्याइने मन्त्रीको भनाइ छ।
अनुगमनका क्रममा स्थानीयले सर्पदंश उपचारसहितको अस्पताल स्थापनाको माग गरेका थिए। मन्त्री लम्सालले आगामी आर्थिक वर्षको बजेटमा आवश्यक रकम व्यवस्था गर्ने प्रतिबद्धता व्यक्त गरे। स्वास्थ्य चौकी स्तरोन्नति र विद्यालयका भौतिक संरचना सुधारका योजनाको प्रतिवेदन पनि यो वर्ष नै तयार पारिने उनले जानकारी दिए।
अनुगमनमा सहभागी सांसद कन्हैया बनियाले स्थानीयवासीका माग र समस्याको अध्ययन गरी योजना कार्यान्वयनमा लैजानुपर्ने बताए।
