वासिङ्टन । अमेरिकी प्रशासनले युक्रेनलाई दिने गुप्तचर सूचना र हतियार सहयोगमा गुप्त रूपमा कटौती गरेको भन्दै युक्रेनी राष्ट्रपति भोलोदिमिर जेलेन्स्कीले सोमबार अमेरिकी सेनेटरहरूसँग आपतकालीन भर्चुअल छलफल गरेका छन्।
रिपब्लिकन सेनेटर थम टिलिस र डेमोक्र्याट सेनेटर रिचर्ड ब्लुमेन्थलको नेतृत्वमा भएको बैठकमा जेलेन्स्कीले आफ्ना गुनासाहरूको सूची पेस गरे। उनका अनुसार ह्वाइट हाउसले प्रतिबन्ध खारेज गरे पनि एलन मस्कको स्टारलिंक र अमेरिकी सैन्य ‘स्टारशिल्ड’ प्रणाली अझै आंशिक रूपमा अवरुद्ध छ, जसले रूसी ड्रोन खसाल्न कठिन बनाएको छ। पछिल्लो एक सातामा रुसले तीनपटक गरेको ब्यालिस्टिक क्षेप्यास्त्र आक्रमणबारे अमेरिकाले कुनै पूर्वचेतावनी नदिएको र नाटो देशहरूले मूल्य चुकाइसकेका प्याट्रिअट तथा एनएएसएएमएस प्रणालीका लागि आवश्यक एआईएम–९एक्स क्षेप्यास्त्र रक्षा सचिव पिट हेगसेथले स्वीकृत नगरेको उनले बताए। उनको दाबी छ — सहयोग सुस्त बनाउने उच्चस्तरीय राजनीतिक निर्णय भइसकेको छ।
यो तनाव १० दिनअघि मियामीमा ट्रम्पका दूत स्टिभ विटकफ र जेरेड कुश्नरसँगको भेटपछि सुरु भएको थियो। युक्रेनी अधिकारीहरूका अनुसार दूतहरूले युक्रेनले रूसी तेल रिफाइनरीमा आक्रमण जारी राखे गुप्तचर सहयोग हटाउन र हतियार बिक्री रोक्न सकिने चेतावनी दिएका थिए। आइतबार जेलेन्स्कीले ३० दिनसम्म रिफाइनरी आक्रमण रोक्ने र त्यस अवधिमा अमेरिकाले ब्यालिस्टिक क्षेप्यास्त्रबाट जोगिन प्याट्रिअट इन्टरसेप्टर उपलब्ध गराउने प्रस्ताव राखे पनि दूतहरू सकारात्मक देखिएनन्। आगामी साता नर्वेको ओस्लोमा यस विषयमा थप छलफल हुन सक्नेछ।
सोमबार सञ्चारकर्मीसँग कुरा गर्दै राष्ट्रपति डोनाल्ड ट्रम्पले अमेरिकाले अझै गुप्तचर जानकारी साझा गरिरहेको दाबी गरे। स्टारलिंक प्रतिबन्धको आदेश कसले दियो भन्ने आफूलाई थाहा नभएको र पत्ता लगाउने उनले बताए। जेलेन्स्कीप्रति असन्तुष्टि व्यक्त गर्दै उनले भने — ‘स्पष्ट भन्नुपर्दा जेलेन्स्कीले खासै सहयोग गरिरहेका छैनन्। उनी युद्ध रोक्न चाहँदैनन्। जेलेन्स्कीलाई मैले के कुरा गरिरहेको छु भन्ने नै थाहा छैन। सायद अब उनले युक्रेनको तर्फबाट वार्ता गर्न अरू कसैलाई जिम्मा दिने बेला आएको छ। हामीले युक्रेनलाई धेरै दिएका छौँ, उनीहरूले हामीलाई केही दिएका छैनन्।’
