काठमाडौँ — बाढीले सडक सम्पर्क टुटेको गोरखाका दुर्गम बस्तीहरूमा ड्रोनमार्फत राहत सामग्री पुर्याइएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले चाडपर्वको समयमा पनि प्रभावित नागरिकसम्म अत्यावश्यक सहयोग पुर्याउन यो प्रविधि प्रयोग गरिरहेको जनाएको छ।
प्राधिकरणका कार्यकारी प्रमुख डा. धर्मराज उप्रेतीका अनुसार बाटो पूर्ण रूपमा बन्द भएका र भौगोलिक रूपमा अत्यन्त विकट क्षेत्रमा राहत वितरणमा ड्रोन निकै उपयोगी सावित भएको छ। ‘हामीसँग अहिले चार वटा ड्रोन छन्। रसुवा र गोरखामा सडक सम्पर्क विच्छेद भएका ठाउँमा ड्रोनमार्फत नै राहत बाँडिरहेका छौँ,’ उनले बताए।
यस वर्षको बाढीले सडक, पुललगायत भौतिक पूर्वाधार बगाउँदा राहत सामग्री आपूर्तिमा प्राधिकरणलाई ठूलो चुनौती थपिएको छ। प्रभावित क्षेत्रमा पुग्ने परम्परागत बाटो बन्द भएपछि उद्धार र राहतका लागि प्राधिकरणले ड्रोन प्रविधिको अधिकतम सदुपयोग गरेको बताइएको छ।
विपद् व्यवस्थापनमा ड्रोनको प्रयोग नेपालमा बढ्दै गएको छ। यसअघि पनि खोजी तथा उद्धार कार्यमा ड्रोन प्रयोग हुँदै आएको थियो। प्राधिकरणले अब दुर्गम तथा जोखिमयुक्त क्षेत्रमा राहत सामग्री ओसार्न यस्तो प्रविधिलाई थप व्यापक बनाउने तयारी गरेको छ।
