नेपाली कांग्रेसका महामन्त्री प्रदीप पौडेलले वर्तमान सरकार प्रतिपक्ष, संसद्, जनता र सञ्चार जगत्प्रति असम्मानजनक व्यवहार गर्दै स्वेच्छाचारी बन्दै गएको आरोप लगाएका छन्। सोमबार सिंहदरबारमा बसेको कांग्रेस संसदीय दलको बैठकमा आफ्नो धारणा राख्दै उनले सरकार पूर्ण रूपमा स्वेच्छाचारी बन्दै गएको दाबी गरे। उनले सरकारले संविधान र कानुनको ठाडो बेवास्ता गरिरहेको बताए।
बैठकमा सहभागी एक सांसदले उनको भनाइ उद्धृत गर्दै बताए। सो सांसदका अनुसार पौडेलले कानुनी व्यवस्थालाई कमजोर पारेर सत्ताको चरम दुरुपयोग भइरहेको र राज्यका संवैधानिक अंगहरूलाई समेत कमजोर बनाउने काम भएको टिप्पणी गरे।
सरकारका गलत कदमविरुद्ध संसद्मा सशक्त आवाज उठाउनुपर्ने बताउँदै उनले अन्य प्रतिपक्षी दलसँग सहकार्य गरेर अघि बढ्नुपर्नेमा जोड दिए। त्यसका लागि प्रतिनिधि सभा र राष्ट्रिय सभाको बैठक तत्काल बोलाउनुपर्ने उनको माग छ।
अदालतमा विचौलियासँग न्यायाधीश, सरकार प्रमुख र प्रहरी नेतृत्व जोडिएको भनिएको सेटिङ प्रकरणको निष्पक्ष छानबिन हुनुपर्ने पनि उनले बताए। यसका लागि उच्चस्तरीय संसदीय समिति गठन गर्नुपर्ने माग गर्दै सरकार आफैंले निष्पक्ष छानबिन गर्छ भन्ने विश्वास नरहेको उनको भनाइ थियो।
