सल्यानका बागचौर र सिद्धकुमाखका बस्तीमा पिउने पानीको खोजीमा बित्ने दिनहरू बिदा हुँदै गएका छन्। घरको आँगनमै धारा पुगेपछि स्थानीयको दैनिकी, काम गर्ने तरिका र बालबालिकाको पढाइमा समेत सकारात्मक फरक देखिन थालेको छ।
पहिले यहाँका धेरै परिवारका लागि पानी जुटाउनु दिनकै ठूलो काम थियो। गाग्री र डोको बोकेर टाढाको मुहानसम्म पुग्नुपर्थ्यो, पालो पर्खनुपर्थ्यो र कहिलेकाहीँ राति नै उठेर हिँड्नुपर्थ्यो। पानी ल्याउँदैमा आधा दिन सकिने भएकाले घरधन्दा र खेतीपाती प्रभावित हुन्थ्यो।
सिद्धकुमाख गाउँपालिका–४ खार्बनकी ८० वर्षीया बिमली रोकाले जीवनभर पानीकै लागि हिँडेको सम्झना सुनाइन्। घरमै धारा देख्दा आफूलाई निकै खुसी लागेको उनले बताइन्। बागचौर नगरपालिका–३ की रेवती परियारले पनि घरनजिकै धारा आएपछि पानी लिन जाने समय बचेको र घरायसी काम गर्न सजिलो भएको बताइन्।
शिशुजागरण माध्यमिक विद्यालयका प्रधानाध्यापक रुपलाल भण्डारीका अनुसार पहिले शौचालय र पानीको अभावले विद्यार्थीले पालो पर्खनुपर्थ्यो। अहिले सुरक्षित पानी र प्रयोगमैत्री शौचालय बनेपछि त्यो समस्या हटेको छ।
आर्थिक वर्ष २०८०/८१ देखि २०८२/८३ सम्म बागचौरमा ११ वटा खानेपानी तथा सरसफाइ योजना सम्पन्न भएका छन्। ती योजनाबाट १ हजार ३ सय २२ भन्दा बढी घरधुरीका ७ हजार ४ सय १७ भन्दा बढी नागरिक लाभान्वित भएका नगरपालिकाले जनाएको छ। टाढा र उचाइमा रहेका बस्तीमा लिफ्ट प्रविधि प्रयोग गरिएको छ। नगर प्रमुख जनकराज गौतमले बाँकी क्षेत्रमा पनि पहुँच विस्तार जारी रहने बताए।
सिद्धकुमाखमा सुस्वा साझेदारीमा कार्यक्रम सञ्चालन भइरहेको छ। आर्थिक वर्ष २०८१/८२ मा पाँच खानेपानी आयोजना र चार प्रयोगमैत्री शौचालय बनेका थिए भने २०८२/८३ मा थप छ खानेपानी आयोजना, तीन विद्यालयका शौचालय निर्माण र एउटा शौचालय मर्मत गरिएको छ। गाउँपालिका अध्यक्ष भरत गिरीले परिवर्तन पूर्वाधारमा मात्र सीमित नरहेको बताए।
