पोखरास्थित कास्की कारागारबाट भागेका एक कैदीलाई प्रहरीले भागेको दुई दिनपछि पक्राउ गरेको छ। पोखरा महानगरपालिका-१८ खपौदीका ३७ वर्षीय सन्तोष जलारीलाई कात्तिक ३ गते पोखराकै एउटा होटलबाट नियन्त्रणमा लिइएको जिल्ला प्रहरी कार्यालय कास्कीले जनाएको छ।
जलारी गत असोज ३१ गते राति करिब २ बजे कारागारबाट भागेका थिए। ज्यान र डाँका सम्बन्धी मुद्दामा २५ वर्ष कैद सजाय भोगिरहेका उनी कारागारभित्र ल्याइएको भर्याङको सहायताले बाहिर निस्किएको अनुसन्धानबाट खुलेको प्रहरीले बताएको छ। उक्त भर्याङ कारागारमा बिजुली मर्मतका लागि ल्याइएको थियो।
जिल्ला प्रहरी कार्यालय कास्कीका प्रमुख प्रहरी उपरीक्षक नवीन कार्कीका अनुसार जलारीले भाग्ने तयारी करिब एक महिनादेखि गरेका थिए। उनले भोलिपल्ट पनि मर्मत गर्नुपर्ने भन्दै भर्याङ आफूले चलाएको पसलकै छेउमा राखेका थिए र मध्यरातमा अरू कैदी तथा नाइकेलाई झुक्काएर भागेको अनुसन्धानमा देखिएको छ। कारागारभित्र जलारीले पसल सञ्चालन गर्दै आएका थिए।
सुरक्षामा खटिएका प्रहरी र कैदीका नाइकेको ध्यान पर्याप्त नपुग्दा उनी भाग्न सफल भएको प्रहरी उपरीक्षक कार्कीले बताए। कारागारका जेलर घनश्याम गौतमका अनुसार भोलिपल्ट बिहान कैदी गणना गर्दा मात्र जलारी नभएको थाहा भएको थियो। यस्तो घटना विरलै हुने भएकाले यसले कारागार सुरक्षामा विशेष ध्यान दिनुपर्ने सन्देश दिएको उनको भनाइ छ।
गण्डकी प्रदेश प्रहरी कार्यालय र जिल्ला प्रहरी कार्यालयबाट खटिएको संयुक्त टोलीले जलारीलाई पक्राउ गरेको हो। उनीमाथि कारागार ऐन सम्बन्धी कसुरमा अदालतबाट म्याद थप गरी अनुसन्धान भइरहेको प्रहरीले जनाएको छ। प्रहरी उपरीक्षक कार्कीका अनुसार नयाँ मुद्दामा थप पाँच वर्षसम्म कैद सजाय हुन सक्नेछ।
