काठमाडौँ । राष्ट्रिय साइबर सुरक्षा केन्द्र (एससीएससी) ले नेपालमा सञ्चालनमा रहेका वेबसाइट तथा अनलाइन प्रणालीहरूमा गम्भीर साइबर सुरक्षा जोखिम भेटिएको जनाएको छ । केन्द्रका अनुसार वेब प्रणाली सञ्चालनमा व्यापक प्रयोग हुने पीएचपी सफ्टवेयरमा दुई वटा गम्भीर प्राविधिक सुरक्षा त्रुटि देखिएका हुन् । यी त्रुटिका कारण सरकारी तथा गैरसरकारी निकायका अनलाइन प्रणालीहरूमा आक्रमणकारीले अनधिकृत पहुँच पुर्याउने वा क्षति पुर्याउने उच्च जोखिम रहेको केन्द्रले चेतावनी दिएको छ ।
केन्द्रले पीएचपीसँगै प्रयोग हुने अपाचे, पीएचपी–एफपीएम, लाइटस्पिड जस्ता वेब सर्भर र वर्डप्रेस, जुम्ला, ड्रुपल, म्याजेन्टो जस्ता सामग्री व्यवस्थापन प्रणालीहरूमा समेत यो जोखिम हुन सक्ने जनाएको छ । यस्तो जोखिम कम गर्न केन्द्रले वेबसाइट सञ्चालकहरूलाई अत्यन्त जरुरी साइबर सुरक्षा सतर्कता (एड्भाइजरी) जारी गरेको हो ।
सुरक्षाका लागि केन्द्रले प्रयोगमा रहेका पीएचपी प्रणालीलाई यथाशीघ्र सुरक्षित संस्करणहरू ८.२.३५, ८.३.३६, ८.४.२७ वा ८.५.१२ वा त्योभन्दा नयाँ संस्करणमा स्तरोन्नति गर्न निर्देशन दिएको छ । सुरक्षा प्याच उपलब्ध नहुने पीएचपी ८.१ वा त्यसभन्दा पुराना संस्करणमा सञ्चालित वेबसाइट तथा प्रणालीलाई अनिवार्य रूपमा नयाँ सुरक्षित संस्करणमा सार्नुपर्ने केन्द्रको भनाइ छ ।
यसैगरी सुधारपछि नयाँ फाइल पूर्ण रूपमा कार्यान्वयनमा ल्याउन अपाचे, पीएचपी–एफपीएम जस्ता वेब सेवाहरू अनिवार्य रूपमा रिस्टार्ट गर्नुपर्ने छ । यदि कुनै प्रणाली तत्काल स्तरोन्नति वा सुधार गर्न सम्भव नभएमा सम्भावित साइबर आक्रमणबाट जोगाउन त्यस्ता प्रणालीलाई सार्वजनिक इन्टरनेटको पहुँचबाट हटाएर सुरक्षित आन्तरिक सञ्जालमा मात्र राख्न वा अस्थायी रूपमा सेवा बन्द गर्न केन्द्रले आग्रह गरेको छ ।
