स्याङ्जाको चापाकोट नगरपालिका–१०, आँधीघाटका किसान प्रेमनारायण पङ्गेनीले व्यावसायिक केरा खेतीबाट वार्षिक एघार लाख रुपैयाँभन्दा बढी आम्दानी गर्दै आएका छन्। उनले आफ्नो थातथलोमै खेती विस्तार गरेर यो आम्दानी हासिल गरेका हुन्। कालीगण्डकी नदी किनारको खेतमा केराको उत्पादन राम्रो हुने देखेर उनले खेती थालेका थिए।
पङ्गेनीले एक रोपनीमा एक सय बिरुवा लगाएर सुरु गरेको व्यवसाय अहिले ६१ रोपनीमा पुगेको छ, जहाँ छ हजार एक सय बिरुवा छन्। सुरुमा उनले स्थानीय मालभोग र जि नाइन प्रजाति लगाएका थिए। पछि जि नाइन हटाएर अहिले मालभोग मात्र लगाएका छन्। केराबाट राम्रो आम्दानी हुन थालेपछि धान र मकै लाग्ने जमिनमा पनि केरा विस्तार गरेका हुन्।
उनको आफ्नै १३ रोपनी जग्गा छ भने बाँकी जग्गा बन्धकी र भाडामा लिएर खेती गरेका छन्। स्थानीय जातको मालभोग केरा अन्य केराभन्दा ठूलो र आकर्षक हुने, विषादीबिना पकाइने भएकाले चापाकोट बजारमा यसको माग उच्च छ। राम्रो र ठूला कोसा भएका केरा प्रतिदर्जन दुई सय रुपैयाँ र साना कोसा भएका केरा प्रतिदर्जन एक सय ५० रुपैयाँमा बिक्री हुन्छन्।
अहिले उत्पादन दिने दुई हजार दुई सय बोटबाटै वार्षिक एघार लाखभन्दा बढी आम्दानी भइरहेको उनले बताए। सबै बोटले उत्पादन दिन थालेपछि वार्षिक आम्दानी तीस लाख रुपैयाँभन्दा बढी पुग्ने उनको लक्ष्य छ। परिवारले खेतीको रेखदेख गर्ने र गोडमेलजस्ता काममा स्थानीयले रोजगारी पाउने गरेका छन्। अन्य पेसाभन्दा केरा खेती सहज लागेको र यसैबाट सबैभन्दा धेरै सन्तुष्टि मिलेको उनको भनाइ छ।
