ढाका । पूर्वप्रधानमन्त्री शेख हसिनाको स्वदेश फिर्तीको माग गर्दै सडकमा उत्रिएका उनका समर्थकमाथि बंगलादेशी प्रहरीले अश्रुग्यास र रबरको गोली चलाएको छ। गोपालगन्ज जिल्लामा प्रतिबन्धित विद्यार्थी संगठन र सुरक्षाकर्मीबीच भएको झडपका क्रममा प्रहरीको एउटा गाडीमा आगो लगाइएको छ।
भारतमा निर्वासनमा रहेकी हसिनाले फर्कन राहदानी मागेको बताएको भोलिपल्टै देशभर प्रदर्शन सुरु भएको हो। सन् २०२४ को अगस्टमा ठूलो जनविद्रोहपछि उनी सत्ताबाट हटेयता उनका समर्थकले गरेको यो पहिलो संगठित शक्ति प्रदर्शन मानिएको छ।
प्रदर्शनकारीले सडकमा टायर बालेर बाटो छेक्दा देशका विभिन्न ठाउँमा यातायात प्रभावित भएको छ र धेरै सवारीसाधनमा आगजनी भएको छ। मंगलबार बिहान फरीदपुरमा गाडीमा आगो लागेपछि धुवाँले निसासिएर ६० वर्षीय एक बस चालकको ज्यान गएको छ।
६ दशमलव २ किलोमिटर लामो पद्मा पुलमा करिब दुई सय प्रदर्शनकारीले केहीबेर यातायात ठप्प पारेका थिए। पछिल्ला केही दिनमा ढाकासहित विभिन्न ठाउँमा दर्जनौँ घरेलु बम विस्फोट भएको बताइएको छ।
गृह मन्त्री सलाउद्दीन अहमदले षड्यन्त्र गरेर शान्तिसुरक्षा बिगार्न नदिने बताएका छन्। निर्वासनमा रहेका अवामी लिगका एक वरिष्ठ नेताले भने हिंसामा समर्थकको हात नरहेको बताएका छन्।
दुई वर्षअघि १५ वर्षे शासन अन्त्य गर्दै हसिना भारत पलायन भएकी थिइन्। संयुक्त राष्ट्रसंघका अनुसार सन् २०२४ को प्रदर्शनमा सुरक्षाकर्मीको गोली लागेर करिब एक हजार चार सय जनाको मृत्यु भएको थियो। उनी देश छाडेलगत्तै अवामी लिग प्रतिबन्धित भयो र गत फेब्रुअरीको निर्वाचनमा भाग लिन पाएन। गत वर्ष विशेष न्यायाधिकरणले मानवता विरुद्धको अपराधमा उनलाई अनुपस्थितिमै मृत्युदण्ड सुनायो। मृत्युदण्डको खतराबीच पनि उनले डिसेम्बरमा फर्कने भन्दै नयाँ दिल्लीस्थित बंगलादेश उच्च आयोगसँग राहदानी मागेकी छिन्। सरकारले भने राहदानी नदिने स्पष्ट पारेको छ। कनिष्ठ विदेश मामिला मन्त्री हुमायु कबिरले उनलाई भगौडा अपराधी भन्दै सुपुर्दगी मागेका छन्।
