मनसुन सकिएपछि बाँके राष्ट्रिय निकुञ्जमा फेरि जङ्गल सफारी सुरु भएको छ। वर्षाका महिनामा बन्द रहेको सफारी खुल्दा पर्यटक आउन थालेका छन् र निकुञ्ज क्षेत्रमा चहलपहल बढेको छ। निकुञ्जभित्रका कच्ची बाटा मर्मत गरिएका छन् भने वर्षापछिको हरियालीले जङ्गल अझ आकर्षक देखिएको छ।
गाभर भ्याली सामुदायिक घरबासका अध्यक्ष कृष्ण चौधरीका अनुसार बाँके राष्ट्रिय निकुञ्ज देशकै सबैभन्दा नयाँ राष्ट्रिय निकुञ्ज हो। यहाँ पाइने चार सिङ भएको दुर्लभ मृग चौसिङ्गा पर्यटकको मुख्य आकर्षण हो। त्यसबाहेक पाटेबाघ, हात्ती, गैँडा, चितुवा र थुप्रै चराचुरुङ्गी हेर्न पाइन्छ।
पर्यटक तान्न निकुञ्ज र स्थानीय व्यवसायीले छुटसहित एक हजार रुपैयाँको प्याकेज ल्याएका छन्। कम खर्चमा सफारी र वन्यजन्तु हेर्ने अवसर मिल्ने भएकाले यो प्याकेजले मध्यमवर्गीय र युवा पर्यटकलाई तानिरहेको छ।
चौधरीले वर्षापछि जङ्गलको रूप फेरिएको र हरियालीसँगै ताजा हावा मिल्ने बताए। उनले स्थानीय परिकार र संस्कृतिसहित पर्यटकलाई स्वागत गर्न तयार रहेको पनि बताए।
नेपालगन्ज उद्योग वाणिज्य सङ्घका अध्यक्ष चिरञ्जीवी वलीले पश्चिम नेपालमा सस्तो र साहसिक यात्राका लागि यो ठाउँ उपयुक्त भएको बताए। उनका अनुसार सहरको कोलाहलबाट टाढा प्रकृति र संस्कृति नजिकबाट चिन्न यो मौसम राम्रो छ।
तथ्याङ्कले पनि आकर्षण बढेको देखाउँछ। आर्थिक वर्ष २०८२/०८३ मा एक हजार चार सय छियासठ्ठी पर्यटक पुगेका थिए भने अघिल्लो वर्ष छ सय बीस र २०८०/०८१ मा चार सय चवालीस थिए। निकुञ्जका प्रमुख वार्डेन वीरेन्द्रप्रसाद कँडेलले निजी क्षेत्रसँग मिलेर प्रवर्द्धनका लागि विशेष योजना बनाएर काम भइरहेको बताए।
