नैरोबी — केन्यामा इबोला सङ्क्रमितको सङ्ख्या बढेर आठ पुगेको छ । स्वास्थ्य अधिकारीहरूका अनुसार पछिल्लो सङ्क्रमित पहिलो बिरामीको उपचारमा संलग्न ४९ वर्षीय परिचारक हुन् । स्वास्थ्य मन्त्रालयका महानिर्देशक डा. प्याट्रिक अमोथले नयाँ सङ्क्रमण पुष्टि भएको जानकारी दिएका हुन् । अहिलेसम्म समुदायस्तरमा सङ्क्रमण फैलिएको पुष्टि भने भएको छैन ।पहिलो सङ्क्रमित कङ्गोबाट युगान्डा हुँदै केन्या आएका थिए र अक्टोबर ५ मा नैरोबीको अस्पतालमा उनको मृत्यु भएको थियो । अन्य छ जना सङ्क्रमितको स्वास्थ्य अवस्था स्थिर रहेको अधिकारीहरूले जनाएका छन् । पहिलो बिरामीको सम्पर्कमा आएका करिब १३० जनाको पहिचान गरिएकामा १२८ जनालाई एकान्तवासमा राखिएको छ भने लक्षण देखिएकाहरूको परीक्षण जारी छ ।इबोला सङ्क्रमितको रगत, शारीरिक तरल पदार्थ वा दूषित वस्तुको प्रत्यक्ष सम्पर्कबाट सर्ने गर्छ । कङ्गोमा मे महिनादेखि फैलिएको प्रकोपमा कम्तीमा चार हजार जनाको ज्यान गएको उल्लेख छ ।प्रकोप फैलन नदिन केन्याले सीमामा स्वास्थ्य जाँच कडा पारेको छ र सङ्क्रमणको आशङ्का भएका व्यक्तिका लागि आपत्कालीन हटलाइन पनि सञ्चालनमा ल्याएको छ । नैरोबीको मुख्य विमानस्थलमा उच्च जोखिम भएका देशबाट आउने यात्रुको जाँचका लागि छुट्टै प्रवेशद्वार तोकिएको छ । छिमेकी तान्जानियाले पनि सीमामा जाँच कडा पार्दै उच्च जोखिम भएका देशबाट आउने यात्रुलाई २१ दिनसम्म निगरानीमा राख्ने व्यवस्था लागू गरेको छ ।