कायरो — इजिप्टको राजधानी कायरो नजिकैको पश्चिमी मरुभूमि राजमार्गमा यात्रुवाहक बस र ट्रक आपसमा ठोक्किँदा कम्तीमा १२ जनाको ज्यान गएको छ भने ३० जना घाइते भएका छन्। दुर्घटना मङ्गलबार कायरो–असियुत राजमार्गमा भएको इजिप्टको स्वास्थ्य तथा जनसङ्ख्या मन्त्रालयले जनाएको छ। दुर्घटनामा परेको बस निजी कम्पनीको भएको बताइएको छ।
घटनास्थलमा उद्धार तथा राहतका लागि २८ वटा एम्बुलेन्स खटाइएको मन्त्रालयले जनाएको छ। घाइतेहरूलाई नजिकैको गिजा प्रान्तका अस्पतालमा लगेर उपचार थालिएको छ। स्वास्थ्यमन्त्री खालिद अब्देल गफारले छिमेकका अस्पताललाई घाइतेलाई आवश्यक उपचार र स्वास्थ्य सेवा उपलब्ध गराउन निर्देशन दिएका छन्।
मन्त्रालयका अनुसार मृतक र घाइतेको हालसम्मको विवरण प्रारम्भिक हो। उद्धार कार्य अझै जारी रहेकाले हताहतीको सङ्ख्या बढ्न सक्ने बताइएको छ। घटनाको पूर्ण विवरण सङ्कलन गर्ने काम पनि भइरहेको मन्त्रालयले जनाएको छ।
