काठमाडौं । शारदीय नवरात्रको अन्तिम दिन आज गोकर्ण जङ्गलस्थित वनदेवी मन्दिरमा ठूलो संख्यामा भक्तजनले दर्शन गरेका छन् । गोकर्णेश्वर नगरपालिका–४ मा रहेको यो मन्दिर वर्षमा नवरात्रका चार दिनमात्र सर्वसाधारणका लागि खुला हुने गर्छ ।
साविकको राजनिकुञ्ज हाल नेपाल ट्रष्टको मातहत रहेको राष्ट्रिय वन क्षेत्रभित्रको यो मन्दिर ऐतिहासिक, पुरातात्विक, सांस्कृतिक र धार्मिक दृष्टिले महत्वपूर्ण मानिन्छ । फूलपातीदेखि विजयादशमीसम्म चार दिनमा हजारौँ भक्तजनले पूजा आराधना गर्ने गरेको नेपाल ट्रष्टको कार्यालय, गोकर्ण दक्षिणढोका एकाईका कर्मचारी प्रकाश केसीले जानकारी दिए । नेपाल ट्रष्टको कार्यालयले वर्षमा एकपटक बोकाको बलिसहित विशेष पूजा गर्दै आएको छ ।
मन्दिर पुग्ने चार वटा प्रवेशद्वार छन् — गोकर्णेश्वर महादेव मन्दिरअघिको नेपाली सेनाको विपद् व्यवस्थापन गणको मूलढोका, उत्तरवाहिनीस्थित पञ्चमुखी हनुमान मन्दिर नजिकैको द्वार, गोकर्ण फरेस्ट रिसोर्टको प्रवेशद्वार र दक्षिणढोकास्थित नेपाल ट्रष्टको कार्यालय । वडा नं. ४ का अध्यक्ष जयराम महतका अनुसार उत्तरवाहिनी र गोकर्ण मन्दिरअघिको बाटोबाट करिब १५ मिनेटको पैदल यात्रामा वनदेवी पुग्न सकिन्छ । राजनिकुञ्जका कारण बन्द भएदेखि यहाँ नित्य पूजा हुन नसकेको उनले बताए ।
राजदरबारले वर्षमा एकपटक बोकाको बलिसहित विशेष पूजा गर्ने परम्परालाई नेपाल ट्रष्टले निरन्तरता दिएको हो । आज वनदेवीसँगै गुह्येश्वरी, जयवागीश्वरी, मैतीदेवी, कालिकास्थान, नक्साल भगवती, भद्रकाली, शोभाभगवती, विजेश्वरी, इन्द्रायणी, रक्तकाली, श्वेतकाली, दक्षिणकाली, चामुण्डामाई, सुन्दरीमाई, बज्रयोगिनी, बगलामुखी, टोखा चण्डेश्वरीलगायत देशभरका शक्तिपीठ र देवी मन्दिरमा बिहानदेखि बेलुकीसम्म भक्तजनको लाम लागेको थियो ।
