काठमाडौं । वैशाखमा उपत्यकाका खोला किनारका बस्ती डोजरले हटाइएपछि होल्डिङ सेन्टरमा थन्किएका सुकुमवासी परिवारका लागि यो दसैं खुसी होइन, अभावको सम्झना बनेको छ । खरिपाटी र बोडेका होल्डिङ सेन्टरमा छ महिनादेखि बस्दै आएका उनीहरूले नयाँ लुगा र मिठोमसिनोबिनाको पर्व मनाएका हुन् ।
खरिपाटी सेन्टरमा रहेकी मेनुका गुरुङको पाँचजनाको परिवार छ । सरकारले दसैं खर्च दिने आशा गरेकी उनले त्यो नपाएपछि फर्सी खाएर चाड मनाउनु पर्यो । सेन्टरको क्यान्टिनले खाना दिन बन्द गरेपछि शान्ति सेवा संस्थाले खुवाएको उनले बताइन् । दसैं अवधिमा संस्थाले दुई छाक कुखुराको मासु र एक छाक खसीको मासु दिएको थियो ।
सोही सेन्टरका ३७ घरधुरीमध्ये गीता लामाको सातजनाको परिवार छ । श्रीमान बिरामी भएकी उनले पकाउने ठाउँ नभएको र मागेर खानुपर्ने अवस्था सुनाइन् ।
बोडेमा रहेको कृषि विकास बैंकको तालिम केन्द्रस्थित होल्डिङ सेन्टरमा करिब ७०–८० जना छन् । राजकुमार माझीका अनुसार संस्थाले भातसँगै एक छाक मासु दिएको छ, र परिवारले आफैं पकाउन पनि मिल्छ । तर निरज थापा र ग्रिवाणिका थापालाई भने सरकारले चासो नदिएको, पानीको अभाव भएको र बच्चाका लागि नयाँ लुगा किन्न नसकेको गुनासो छ । सबैको एउटै माग छ — आफ्नै बस्ने बास ।
