काठमाडौं — नेपाल प्रहरीको महानिरीक्षक फेरबदल गर्ने निर्णयमा सत्तारूढ राष्ट्रिय स्वतन्त्र पार्टीको समेत निर्देशन रहेको सरकारका प्रवक्ताले बताएका छन्। शिक्षा तथा खेलकुद मन्त्रीसमेत रहेका प्रवक्ता सस्मित पोखरेलले बुधबारको निर्णय सुनाएपछि सञ्चारकर्मीका प्रश्नको जवाफमा यस्तो बताएका हुन्।
बुधबार बसेको सरकारको बैठकले महानिरीक्षक दानबहादुर कार्कीलाई हटाएर मनोज केसीलाई नयाँ प्रहरी प्रमुख बनाउने निर्णय गरेको थियो। कार्कीलाई प्रधानमन्त्री बालेन शाहको प्रमुख सुरक्षा सल्लाहकार बनाइएको छ।
प्रवक्ता पोखरेलका अनुसार बदलिँदो परिस्थितिमा एउटा संवेदनशील विषयमा सरकारले केही गर्नुपर्छ भन्ने सन्देश पार्टीबाट आएको थियो र त्यसैका आधारमा कार्कीको जिम्मेवारी फेरबदल गरिएको हो। प्रधानमन्त्रीलाई शान्ति सुरक्षाका विषयमा सल्लाह दिने जिम्मेवारी आफैंमा संवेदनशील भएको उनको भनाइ थियो।
सरकारले कार्कीलाई कारबाही गरिएको नभई उनको जिम्मेवारी मात्र हेरफेर गरिएको दाबी गर्दै आएको छ। पछिल्ला दिनमा प्रहरीले सञ्चारगृह र पत्रकारमाथि धरपकड गरेपछि कार्कीको चर्को आलोचना भएको थियो।
प्रहरीभित्र कार्की र केसीबीच टकराव रहेको र सरकारले कार्कीलाई हटाउन खोजेको समाचार बाहिरिएपछि स्रोत खोज्दै प्रहरीले पत्रकार तथा सञ्चारगृहमा छापा मारेको थियो। यसअघि रास्वपा सांसद खगेन्द्र सुनारले संसदीय समितिको बैठकमै निर्वाचन प्रहरीको पोशाकमा भ्रष्टाचार भएको आरोप आइजिपीमाथि लगाएका थिए। समितिमा परेको उजुरी अध्ययन गर्न रास्वपा सांसद मनिष झाको नेतृत्वमा अध्ययन समिति समेत गठन गरिएको छ।
