चितवनको पर्यटकीय स्थल जलविरे झरना घुमेर फर्कने क्रममा कार खोलामा खस्दा एक भारतीय नागरिकको ज्यान गएको छ। बुधबार दिउँसो भएको दुर्घटनामा कार चालकको घटनास्थलमै मृत्यु भएको प्रहरीले जनाएको छ।
इच्छाकामना गाउँपालिका–६ स्थित जलविरे झरना (लामो झरना) बाट फर्किँदै गर्दा डब्लुबी ०२ एपी ३४५८ नम्बरको भारतीय कार अनियन्त्रित भएर खोलामा खसेको थियो। दुर्घटनामा चालकको घटनास्थलमै ज्यान गएको हो।
मृतकको साथमा भेटिएको राहदानीका आधारमा उनको पहिचान भारतको पश्चिम बङ्गाल, कालिम्पोङका ४१ वर्षीय सायन्तन गायेनका रूपमा भएको छ। प्रारम्भिक अनुसन्धानमा कारमा चालक मात्र सवार रहेको देखिएको जिल्ला प्रहरी कार्यालय चितवनले जनाएको छ।
दुर्घटना कसरी भयो भन्नेबारे थप विवरण आउन बाँकी रहेको र प्रहरीले आवश्यक अनुसन्धान गरिरहेको जनाइएको छ।
