राष्ट्रिय प्रजातन्त्र पार्टीका अध्यक्ष राजेन्द्र लिङ्देनले आफ्नो सम्पत्ति छानबिन गर्न सरकारलाई खुला चुनौती दिएका छन्। बुधबार काठमाडौंमा पार्टीको जिल्ला समितिले आयोजना गरेको कार्यक्रममा बोल्दै उनले आफू र आफ्नो पार्टीका नेताहरूको सम्पत्ति जाँच्न तयार रहेको बताए।
लिङ्देनले संसद्मा पुगेदेखि नै सार्वजनिक जिम्मेवारीमा रहेका व्यक्तिको सम्पत्ति छानबिन हुनुपर्ने माग उठाउँदै आएको स्मरण गराए। छानबिनमा आफूविरुद्ध भ्रष्टाचार पुष्टि भएमा जस्तोसुकै सजाय भोग्न तयार रहेको उनको भनाइ थियो। यस्तो अवस्थामा राजनीतिबाट सन्यास लिने र विपक्षीको घरमा भाँडा माझ्नसमेत पछि नपर्ने उनले बताए।
सरकारले गठन गरेको सम्पत्ति छानबिन आयोगको काम अघि नबढ्नु रहस्यमय भएको उनको टिप्पणी थियो। आफूले भने स्वेच्छाले आफ्नो सम्पत्ति विवरण बुझाइसकेको उनले जानकारी दिए।
पार्टीको आगामी महाधिवेशनबारे बोल्दै लिङ्देनले कार्यकर्ता र आकाङ्क्षी नेताहरूलाई संयम अपनाउन आग्रह गरे। नेतृत्व चयन सहमतिबाट हुन सके उत्तम हुने, नभए स्वस्थ प्रतिस्पर्धाबाट छनोट गर्नुपर्ने उनको धारणा थियो। व्यक्तिगत स्वार्थका लागि एकअर्काको मानमर्दन नगर्न र पार्टीको एकता तथा प्रतिष्ठालाई सर्वोपरि राख्न उनले सचेत गराए।
आफ्नो भ्रष्टाचारविरोधी अडान सिद्धान्त, वचन र व्यवहार तीनै तहमा रहेको उनको दाबी थियो।
