काठमाडौं । नेपाली कांग्रेसले आफ्नो वैधानिकताबारे उठेका आरोपको स्वतन्त्र, निष्पक्ष, विधिसम्मत र विश्वसनीय अनुसन्धान गर्न माग गरेको छ ।
बुधबार केन्द्रीय कार्यालय सानेपामा बसेको विशेष बैठकपछि आयोजित पत्रकार सम्मेलनमा वरिष्ठ उपसभापति विश्वप्रकाश शर्माले बैठकले यस्तो माग गरेको जानकारी दिए । उनले पार्टी आफूमाथि उठ्ने हरेक प्रश्नको सामना गर्न र जस्तोसुकै छानबिनका लागि तयार रहेको बताए ।
शर्माले आफ्नो वैधानिकताबारे सार्वजनिक भएका तथाकथित अडियो बयान र प्रचारलाई निराधार, कपोलकल्पित र नियोजित भएको आरोप लगाए । षड्यन्त्रमा संलग्न पात्रहरू समयक्रममा उजागर हुँदै जाने उनको भनाइ थियो ।
उनले प्रहरी हिरासतमा रहेका विचौलिया इनम सापकोटाको मोबाइल प्रधानमन्त्री बालेन शाहका सल्लाहकार कुमार बेन कहाँ पुगेको भन्ने समाचारबारे पनि प्रश्न उठाए । प्रहरीले कब्जा गरिसकेको मोबाइल त्यहाँ कसरी पुग्यो र त्यस अवधिमा के भयो भन्ने विषयमा उनले जवाफ मागे ।
शर्माले सुनकोशी–मरिन डाइभर्सनका कर्मचारी हटाइएको विषयमा पनि आपत्ति जनाए । प्रतिपक्षी दलका नेताले प्रधानमन्त्री कार्यालयलाई श्रम शिविरसँग तुलना गरेको प्रसङ्ग उल्लेख गर्दै उनले कांग्रेसले अहिलेको विषयलाई अत्यन्त गम्भीरतापूर्वक लिइरहेको बताए ।
