इटालियन क्लब कोमोले युरोपेली च्याम्पियन्स लिगमा कीर्तिमानी जित निकालेको छ। बुधबार राति भएको खेलमा कोमोले फ्रान्सेली क्लब लेन्सलाई ९–१ को फराकिलो अन्तरले हराउँदै एकै खेलमा सर्वाधिक गोल गर्ने कीर्तिमान बराबरी गर्यो।
पहिलो हाफमा कोमोले तीन गोल गर्यो। तासोस डुभिकासले सातौं र ३२औं मिनेटमा गोल गर्दै टोलीलाई अग्रता दिलाए भने निको पाजले ४०औं मिनेटमा गोल थपे। दोस्रो हाफमा लुकास दा कुन्हाले ४७औं, डुभिकासले ५७औं, म्याक्सेन्स केम्पफले ५३औं, माटेओ लिबेरालीले ६२औं र मार्टिन बटुरिनाले ६९औं मिनेटमा गोल गरे। डुभिकासको तेस्रो गोलसँगै उनको ह्याट्रिक पूरा भयो। माटेओ पापाचोलीले इन्जुरी समयमा नवौं गोल थपे। लेन्सका रुबेन अगुइलारले ६५औं मिनेटमा एक गोल फर्काएका थिए।
यसअघि जर्मन क्लब बायर्न म्युनिखले सन् २०२४ मा डिनामो जाग्रेबविरुद्ध ९ गोल गरेको थियो। कोमोले विपक्षीको मैदानमा यति ठूलो अन्तरको जित निकाल्ने दुर्लभ उपलब्धि पनि हासिल गर्यो। प्रतियोगितामा यसअघि लिभरपुल र रियल म्याड्रिडले घरेलु मैदानमा ८–० को जित निकालेका थिए भने कोमो आठ गोलको अन्तरमा जित्ने तेस्रो टोली बन्यो। युरोपेली प्रतियोगितामा सन् १९७१ मा फेयेनोर्डले ओलम्पियाकोस निकोसियालाई ९–० ले हराएयता कुनै टोलीले अवे मैदानमा नौ गोल गरेको थिएन।
सेस्क फाब्रेगासको प्रशिक्षणमा रहेको कोमोले आरबी लाइपजिग र म्यानचेस्टर युनाइटेडलाई हराइसकेको छ भने फेयेनोर्डसँग मात्र हारेको छ। यो जितसँगै कोमो लिग चरणको तालिकामा चौथो स्थानमा उक्लिएको छ। केही वर्षअघि इटालीको चौथो श्रेणीमा रहेको क्लब सन् २०१९ मा इन्डोनेसियाली अर्बपति रोबर्ट बुदी हार्तोनो र माइकल बाम्बाङ हार्तोनोको स्वामित्वमा आएपछि तीव्र प्रगति गर्दै आएको छ।
