बङ्गलादेशको राजधानी ढाकामा बिहीबारदेखि सुरु हुन लागेको साफ च्याम्पियनसिप २०२६ मा नेपालको सहभागिता रहने छैन। अखिल नेपाल फुटबल संघमाथि अन्तर्राष्ट्रिय फुटबल महासङ्घले लगाएको निलम्बन अझै फुकुवा नभएपछि नेपाली राष्ट्रिय टोलीले यसपटकको क्षेत्रीय प्रतियोगिता खेल्न नपाउने भएको हो।
फिफाले गत जुन २४ मा एन्फालाई निलम्बन गरेको थियो। सरकारी निकाय तथा तेस्रो पक्षको हस्तक्षेप भएको भन्दै उक्त निर्णय गरिएको थियो। एन्फाको आर्थिक कारोबार र प्रशासनिक काममा सरकारी निकायले गरिरहेको अनुसन्धानलाई फिफाले आफ्नो विधानविपरीत ठानेको थियो। फिफाको नियमअनुसार सदस्य राष्ट्रका फुटबल संघहरूले सरकारी वा राजनीतिक दबाबबिना स्वतन्त्र रूपमा काम गर्नुपर्छ।
नेपालमा केन्द्रीय अनुसन्धान ब्युरोसहितका सरकारी निकायले एन्फाको आर्थिक कारोबार, जर्सी बिक्री, टिकट व्यवस्थापनमा देखिएका अनियमितता र प्रशासनिक गतिविधिबारे छानबिन अघि बढाएका थिए। यही पृष्ठभूमिमा फिफाले निलम्बनको कदम चालेको हो।
नेपालको सहभागिता जोगाउन दक्षिण एसियाली फुटबल महासङ्घले केही लचकता देखाएको थियो। अगस्ट १ मा भएको समूह विभाजन कार्यक्रममा एन्फालाई आन्तरिक विवाद मिलाउन दुई महिनाको समय दिइएको थियो। नेपाल सुरुको समूह विभाजनमा परेको थिएन, तर सेप्टेम्बर ३० भित्र प्रतिबन्ध हटेमा आयोजक बङ्गलादेश रहेको समूहमा नेपाललाई राख्ने व्यवस्था गरिएको थियो। तोकिएको मितिभित्र प्रतिबन्ध नहटेपछि नेपाल प्रतियोगिताबाट बाहिरिन पुगेको हो।
नेपालले अहिलेसम्म साफ च्याम्पियनसिपको उपाधि जित्न सकेको छैन, तर यस प्रतियोगितामा निरन्तर सहभागी हुँदै आएको थियो। सन् २०२१ मा नेपाल पहिलो पटक फाइनलमा पुगेको थियो, जहाँ भारतसँग ३-० गोलले पराजित हुँदै उपविजेतामा सीमित भएको थियो।
प्रतिबन्धको असर साफ च्याम्पियनसिपमा मात्र सीमित हुने छैन। फिफा र एसियाली फुटबल महासङ्घका प्रतिबन्ध कायम रहेसम्म नेपाली राष्ट्रिय टोली र घरेलु क्लबहरूले आधिकारिक अन्तर्राष्ट्रिय प्रतियोगिता खेल्न पाउने छैनन्। यसले नेपाली फुटबलको अन्तर्राष्ट्रिय प्रतिस्पर्धा, खेलाडीको अनुभव र घरेलु फुटबलको विकासमा समेत प्रभाव पार्ने देखिएको छ।
