उद्योगपति विनोद चौधरी नेपाली कांग्रेसको समावेशी उपसभापतिमा निर्वाचित भएपछि उनको योग्यतामाथि पार्टीभित्रै प्रश्न उठिरहेको छ । धनाढ्य वर्गको प्रतिनिधित्व गर्ने चौधरीले खुला प्रतिस्पर्धा गर्न सक्ने भए पनि समावेशी कोटा प्रयोग गरेर अरूको भाग खोसेको भन्दै आलोचना भइरहेको छ ।
१४औँ महाधिवेशनमा सभापतिका निकटतम प्रतिद्वन्द्वी डा. शेखर कोइरालाले केन्द्रीय कार्यसमिति बैठकमै लिखित मन्तव्य राख्दै चौधरीको केन्द्रीय सदस्य बन्ने योग्यतामाथि प्रश्न उठाएका थिए । २०८२ असार १६ गते बसेको बैठकमा कोइरालाले आफ्नो धारणा राखेका थिए ।
उनको लिखित धारणाको बुँदा नम्बर ६ मा चौधरीको केन्द्रीय सदस्य बन्ने योग्यता थियो कि थिएन र क्रियाशील सदस्यको १० वर्षे अवधि पुग्थ्यो कि पुग्दैनथ्यो भन्ने प्रश्न उठाइएको थियो । उनले पहिलो पटक गिरिजाप्रसाद कोइरालासँग सभापतिमा प्रतिस्पर्धा गर्दा सुजाता कोइरालाले केन्द्रीय सदस्य लड्ने इच्छा व्यक्त गरे पनि १० वर्ष नपुगेकाले गिरिजाबाबुले उम्मेदवार बन्न नदिएको स्मरण गराएका थिए ।
चौधरी क्रियाशील सदस्य बनेको १० वर्ष नपुग्दै केन्द्रीय सदस्य उम्मेदवार बनेर निर्वाचित भएको भन्दै खारेजीको मागसहित दायर रिट अहिले पनि सर्वोच्च अदालतमा विचाराधीन छ । २०७४ सालमा तत्कालीन सभापति शेरबहादुर देउवाले पत्र लेखेरै पार्टी प्रवेश गर्न आग्रह गरेपछि कांग्रेस प्रवेश गरेका चौधरी पार्टी प्रवेश गरेको ९ वर्षमै केन्द्रको उपसभापतिमा समावेशी कोटाबाट निर्वाचित भएका छन् । जबकि विधानमा केन्द्रीय सदस्य र पदाधिकारी बन्न क्रियाशील सदस्य भएको १० वर्ष पुगेको हुनुपर्ने व्यवस्था कायमै छ ।
