भारतीय विदेश सचिव विक्रम मिस्रीले बिहीबार बिहान प्रधानमन्त्री बालेन्द्र शाहसँग सिंहदरबारस्थित प्रधानमन्त्री तथा मन्त्रिपरिषद्को कार्यालयमा शिष्टाचार भेटवार्ता गरेका छन्। भेटमा प्रधानमन्त्रीको आसन्न भारत भ्रमण र त्यसक्रममा उठाइने विषयबारे छलफल भएको छ।
भेटवार्तामा नेपाल र भारतबीचको ऐतिहासिक द्विपक्षीय सम्बन्धलाई थप सुदृढ र विस्तार गर्ने विषयमा कुराकानी भएको प्रधानमन्त्रीको सचिवालयले जनाएको छ। दुई देशबीचको आपसी हित, कनेक्टिभिटी, व्यापार, सांस्कृतिक सम्बन्ध तथा विकास सहकार्यलाई थप प्रभावकारी बनाउने विषयमा पनि छलफल भएको छ।
विदेश सचिव मिस्रीले भेटका क्रममा भारत सरकारका तर्फबाट नेपालको विकास र समृद्धिमा निरन्तर सहकार्य गर्ने प्रतिबद्धता व्यक्त गरेका छन्। उनले भोटेकोशी बाढीबाट भएको मानवीय तथा भौतिक क्षतिप्रति दुःख व्यक्त गर्दै बाढीबाट विस्थापितको पुनर्स्थापना र पुनर्निर्माणका लागि भारत सहयोग गर्न तयार रहेको बताएका छन्।
दुईदिने औपचारिक भ्रमणका लागि बुधबार काठमाडौं आएका मिस्रीले परराष्ट्रमन्त्री शिशिर खनाल, अर्थमन्त्री स्वर्णिम वाग्ले, ऊर्जा, जलस्रोत तथा सिँचाइमन्त्री विराजभक्त श्रेष्ठ र पूर्वाधार विकासमन्त्री सुनिल लम्सालसँग छुट्टाछुट्टै भेटवार्ता गरेका थिए। उनले परराष्ट्र सचिव अमृत राईसँग पनि द्विपक्षीय भेटवार्ता गरेका थिए।
प्रधानमन्त्री बालेनको भारत भ्रमण मंसिरको पहिलो सातादेखि हुने भनिएको छ। भ्रमणको तयारी परराष्ट्र मन्त्रालय र भारतीय विदेश मन्त्रालयले अघि बढाइरहेका छन्। तर भ्रमणको औपचारिक मिति र विस्तृत कार्यसूची भने सार्वजनिक भइसकेको छैन। विदेश सचिव मिस्री भेटघाट सकेर बिहीबार अपराह्न स्वदेश फर्किने कार्यक्रम छ।
