काठमाडौं । नेपाल प्रिमियर लिग (एनपीएल) को तेस्रो संस्करणमा लुम्बिनी लायन्सले आफ्नो अपराजित यात्रा कायमै राखेको छ । बिहीबार भएको दिनको पहिलो खेलमा लुम्बिनीले जनकपुर बोल्ट्सलाई १६ रनले हरायो ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर ब्याटिङ गरेको लुम्बिनीले निर्धारित २० ओभरमा ८ विकेट गुमाएर १४९ रन बनाएको थियो । कप्तान रोहितकुमार पौडेलले ३० बलमा १ छक्का र ३ चौकासहित ३४ रन बनाए । निरोशन डिकवेलाले २७ बलमा २७, दिलिप नाथले १६ बलमा २५ र आशिफ शेखले २१ बलमा २१ रनको योगदान दिए ।
१५० रनको लक्ष्य पछ्याएको जनकपुरले ८ विकेट गुमायो । कप्तान हर्मित सिंहले २० बलमा ३ छक्कासहित ३३, आदित्य महताले २३ बलमा ४ छक्कासहित अविजित ३०, सैफ हसनले २५ बलमा २८ र तृतराज दासले १८ बलमा १८ रन बनाए । लुम्बिनीका डार्सी सर्टले ३, तिलक भण्डारी र शेर मल्लले समान २ तथा रुवेन ट्रम्पेलम्यानले १ विकेट लिए । जनकपुरका विशाल सुस्लिङ र राहुल यादवले समान २ तथा कप्तान हर्मित सिंह, अभिषेक तिवारी र ललित राजवंशीले समान १ विकेट लिए ।
यो जितसँगै लुम्बिनी ४ खेलमा ७ अंकसहित तालिकाको शीर्ष स्थानमा यथावत् छ भने जनकपुर ५ खेलमा ४ अंकसहित चौथो स्थानमा छ । बिहीबार हुने दिनको दोस्रो खेलमा विराटनगर किङ्ग्स र काठमाण्डु गोर्खाज खेल्दैछन् ।
