काठमाडौँ । संसदीय सुनुवाइ समितिले सर्वोच्च अदालतका लागि प्रस्तावित चार न्यायाधीशको संसदीय सुनुवाइ शुक्रबार र शनिबार गर्ने भएको छ ।
सिंहदरबारमा बिहीबार बसेको समितिको बैठकले सुनुवाइका लागि समिति सचिवालयले तयार पारेको कार्यतालिका पारित गरेको हो । कार्यतालिकाअनुसार शुक्रबार उजुरीकर्तासँग छलफल गर्नुका साथै प्रस्तावित न्यायाधीशद्वय डा. रत्नबहादुर बागचन्द र चन्द्रबहादुर सारूको सुनुवाइ गरिनेछ ।
शनिबार भने जनक पाण्डे र गोकर्ण डाँगीको संसदीय सुनुवाइ हुनेछ । समितिका सभापति बोधनारायण श्रेष्ठले सुनुवाइको कार्यतालिका सार्वजनिक गरेका हुन् ।
सभापति श्रेष्ठका अनुसार डा. बागचन्दविरुद्ध पाँच, सारूविरुद्ध छ, पाण्डेविरुद्ध १० र डाँगीविरुद्ध सात उजुरी परेका छन् । पाँच जनाले चारै जनाविरुद्ध उजुरी दिएका छन् । बैठकमा प्रस्तावित न्यायाधीशविरुद्ध परेका उजुरी अध्ययनका लागि समितिका सदस्यहरूलाई वितरण गरिएको थियो ।
गत असोज २० गते बसेको न्याय परिषद्को बैठकले सर्वोच्च अदालतको न्यायाधीशमा नियुक्तिका लागि यी चार जनाको नाम सिफारिस गरेको थियो ।
