काठमाडौं — पूर्वाधार विकासमन्त्री सुनिल लम्सालले नेपाल पूर्वाधार सम्मेलनको पूर्वसन्ध्यामा पूर्वाधार तथा लगानीसँग सम्बन्धित धेरै नीतिगत र कानुनी सुधार गर्न लागिएको बताएका छन्।
पूर्वाधार विकास मन्त्रालय, नेपाल उद्योग परिसंघ र नेपाल निर्माण व्यवसायी महासंघले संयुक्त रूपमा आयोजना गरेको पत्रकार सम्मेलनमा मन्त्री लम्सालले यस्तो बताएका हुन्। उनले नेपालमा विकासको बाधकका रूपमा चित्रित गरिँदै आएको कानुनी समस्याको उल्झन अन्त्य गर्न खोजेको स्पष्ट पारे।
‘हामीले पूर्वाधार निर्माणको बाधकका रूपमा चित्रित गरिएको कानुनी उल्झनहरूको अन्त्य गर्ने गरी काम गरिरहेका छौँ,’ उनले भने। मुलुकमा लगानीमैत्री वातावरण बनेको उल्लेख गर्दै उनले विदेशी लगानीकर्ताहरूलाई ढुक्क भएर लगानी गर्न आह्वान गरे।
मन्त्री लम्सालले नेपाल पूर्वाधार सम्मेलनमा सरकारले कानुनी र नीतिगत अड्चनमा गरेका सुधारका कार्यलाई सोकेसका रूपमा प्रस्तुत गर्ने योजना रहेको बताए। मुलुकमा लगानीमैत्री वातावरण भएकाले दातृनिकायले पनि ढुक्क भएर लगानी गर्न सक्ने उनले बताए। नीतिगत र कानुनी सुधारसँगै आयोजना कार्यान्वयनमा हुने ढिलासुस्ती र अन्य विकृतिको पनि अन्त्य हुने उनको भनाइ छ।
पत्रकार सम्मेलनमा मन्त्री लम्सालले सम्मेलनको तयारी र सरकारले गरिरहेका सुधारका कामबारे जानकारी दिएका थिए।
