काठमाडौँ । अर्थमन्त्री डा. स्वर्णिम वाग्लेले आगामी नेपाल पूर्वाधार सम्मेलन विगतका सम्मेलनभन्दा पूर्ण रूपमा फरक ढंगले आयोजना गर्न लागिएको बताएका छन् । सम्मेलनबारे बिहीबार काठमाडौँमा आयोजित पत्रकार सम्मेलनमा बोल्दै उनले यसपटक पुरानो परम्परालाई निरन्तरता दिनेभन्दा पनि स्थापित मान्यतालाई भत्काएर अघि बढ्ने सोच रहेको स्पष्ट पारे ।
अर्थमन्त्री वाग्लेका अनुसार सम्मेलनलाई बिल्कुलै नयाँ पहिचानसहित प्रस्तुत गर्ने गरी तयारी भइरहेको छ । पूर्वाधार र लगानी क्षेत्रमा आवश्यक नीतिगत तथा कानुनी सुधारका लागि आमूल परिवर्तनकारी पुनर्संरचना गर्ने दिशामा सरकारले काम गरिरहेको उनले जानकारी दिए । यस्तो संरचनागत परिवर्तनले मात्र पूर्वाधार विकासमा वास्तविक गति आउने उनको भनाइ थियो ।
सरकारले अर्थतन्त्र, कानुन, स्रोतसाधन, शान्ति र न्यायलगायतका क्षेत्रमा गहिरो सुधार हुने गरी काम गरिरहेको पनि अर्थमन्त्रीले बताए । पूर्वाधार विकासलाई उच्च प्राथमिकतामा राखेर नीतिगत सुधार गर्दै मुलुकलाई एकैपटक माथि उठाउने लक्ष्य रहेको उनले उल्लेख गरे ।
निजी क्षेत्रलाई पूर्वाधार क्षेत्रमा लगानी गर्न आकर्षित गर्ने गरी देखिएका नीतिगत तथा अन्य अप्ठेरालाई व्यवस्थित गरिने पनि अर्थमन्त्री वाग्लेले बताए । उनका अनुसार लगानीमैत्री वातावरण बनाउँदै पूर्वाधार निर्माणमा निजी पुँजी भित्र्याउने सरकारको मुख्य प्राथमिकता हो ।
