फ्रान्समा बिहीबार महँगी, न्यून तलब र सार्वजनिक सेवामा भइरहेको खर्च कटौतीको विरोधमा देशभर ठूलो आन्दोलन भएको छ। ट्रेड युनियनहरूको आह्वानमा भएको आमहडतालमा देशका करिब दुई सय ठाउँमा जुलुस निकालिएका छन्।
गृह मन्त्रालयका अनुसार राजधानी पेरिसबाहेकका सहरहरूमा मात्रै दुई लाख ७० हजारभन्दा बढी मानिस सडकमा उत्रिएका थिए। पेरिसमा पनि ठूलो भीड जम्मा भएको थियो। आन्दोलनका कारण रेल, विद्यालय र अस्पतालजस्ता सार्वजनिक सेवा नराम्ररी प्रभावित भए। निर्धारित रेल सेवामध्ये करिब ४० प्रतिशत रद्द भए भने पर्यटकहरूको मुख्य आकर्षण एफिल टावरसमेत बिहीबार बन्द रह्यो।
लियोँ र नान्त सहरमा प्रहरी र प्रदर्शनकारीबीच झडप भयो। लियोँमा प्रहरीले अश्रुग्यास प्रयोग गर्यो भने केही प्रदर्शनकारीले प्रहरीतर्फ सामान फ्याँके र एउटा कारमा आगो लगाए। टुलुज नजिकै एउटा विद्यालयमा पनि आगजनी भयो; विद्यार्थी र कर्मचारीलाई सुरक्षित ठाउँमा सारिएको शिक्षामन्त्री एडुआर गेफ्रेले बताए।
श्रमिक सङ्गठनहरूले न्यूनतम तलब तुरुन्तै बढाउन माग गरेका छन्। सबैभन्दा ठूलो सङ्गठन सीजीटीले १० प्रतिशत वृद्धि मागेको छ भने सीएफडीटीले मासिक तलबमा १०० युरो थप्नुपर्ने बताएको छ। सरकारले नोभेम्बर १ देखि लागू गरेको वृद्धिले मासिक आम्दानीमा १५ युरो मात्र थपिने भएकाले सङ्गठनहरू असन्तुष्ट छन्।
विद्यार्थी सङ्गठनहरूले शिक्षा बजेटमा १० अर्ब डलरभन्दा बढी थप्न, विद्यालय भवनमा डेढ अर्ब डलर लगानी गर्न र विश्वविद्यालयमा थप दुई लाख ५० हजार सिट सिर्जना गर्न माग गरेका छन्। सन् २०१८ मा सुरु भएको ‘येलो भेस्ट’ आन्दोलन पनि यस प्रदर्शनमा सहभागी भयो र राष्ट्रपति इम्यानुएल म्याक्रोँको राजीनामा माग्यो।
