कपिलवस्तुको कृष्णनगर नगरपालिकाका २६१ परिवारले लामो प्रतीक्षापछि आफ्नो जग्गाको कानुनी स्वामित्व प्रमाणित गर्ने जग्गाधनी दर्ता प्रमाणपुर्जा पाएका छन्। गाउँब्लक जग्गाको पुर्जा नहुँदा वर्षौंदेखि भोगचलन गर्दै आएको जग्गाको स्वामित्व प्रमाणित गर्न नसक्दा उनीहरूले अनेक समस्या भोग्दै आएका थिए।
कृष्णनगर नगरपालिका–९ मा आयोजित कार्यक्रममा नगरपालिका र नापी कार्यालय तौलिहवाको संयुक्त आयोजनामा वडा नं १, ७ र ९ का जग्गाधनीलाई पुर्जा वितरण गरिएको हो। नगरपालिकाका अनुसार वडा नं १ का ७३, वडा नं ७ का ४९ र वडा नं ९ का १३९ जनाले प्रमाणपुर्जा पाएका छन्।
पुर्जा पाएकी ८० वर्षीया मधुरा कुर्मिनीले जीवनको उत्तरार्धमा आफ्नो जग्गाको स्वामित्व प्रमाणित हुने कागजात हात परेकोमा खुसी व्यक्त गरिन्। उनी भन्छिन्, वर्षौंदेखि यही जग्गामा बस्दै र भोगचलन गर्दै आए पनि आफ्नो नाममा पुर्जा थिएन, अहिले बुढेसकालमा भए पनि पुर्जा पाउँदा निकै खुसी लागेको छ।
वडा नं ९ का छेदी अहिरले पाँच पुस्तादेखि भोगचलन हुँदै आएको जग्गाको पुर्जा अहिले आएर पाएको बताए। पुर्जा नहुँदा स्वामित्वसम्बन्धी अन्योल रहँदै आएको उनको भनाइ छ।
नगर प्रमुख रजतप्रताप शाहले गाउँब्लक जग्गाधनीलाई पुर्जा उपलब्ध गराउने कार्यलाई नगरपालिकाले प्राथमिकतामा राखेको बताए। पुर्जा पाएपछि स्थानीयवासीको जग्गामाथिको कानुनी स्वामित्व सुरक्षित हुनुका साथै आर्थिक तथा सामाजिक गतिविधिमा सहज हुने उनको भनाइ छ। नगरपालिकाभित्र रहेका बाँकी गाउँब्लक जग्गाधनीलाई पनि क्रमशः प्रमाणपुर्जा उपलब्ध गराइने उनले जानकारी दिए।
नगर प्रमुख शाहले कृष्णनगर बजार, बहादुरगञ्ज बजार र सिर्सिहवामा रहेका बहाल बिटौरी जग्गाको पुर्जा वितरणका लागि प्रक्रिया अघि बढ्ने बताए। त्यसका लागि अध्यादेश आइसकेको र आयोग गठन भएपछि छिट्टै काम अगाडि बढाइने उनको भनाइ छ।
नापी कार्यालय तौलिहवाका प्रमुख जनक भण्डारीले विसं २०७० मा नापी गरिएको जग्गाको नापजाँच तथा दर्ता प्रक्रिया पूरा गरी प्रमाणपुर्जा वितरण गरिएको जानकारी दिए। उनले पुर्जामा जग्गाधनीको नाम, कित्ता नम्बर र क्षेत्रफललगायत विवरण ध्यानपूर्वक जाँच गर्न आग्रह गरे। विवरण त्रुटिपूर्ण भएमा सम्बन्धित कार्यालयमा सम्पर्क गरी सच्याउन सकिने उनले बताए।
